తన నటనతో రెబెల్ స్టార్ గా పేరుతో పాటుగా, అశేష అభిమానుల్ని సంపాదించుకున్న నటుడు కృష్ణంరాజు పుట్టినరోజు నేడు. ఈ సందర్భంగా ఆయన మీడియాతో మాట్లాడుతూ... 'నేను నటించిన "తాండ్ర పాపారాయుడు", "భక్త కన్నప్ప" వంటి చిత్రాలను అదే క్వాలిటీతో ఇప్పుడు తీయడం దుస్సాహసం. ఈ ఏడాది నుండి మా గోపీకృష్ణ మూవీస్ బ్యానర్ నుంచి ఏకధాటిగా సినిమాలు నిర్మించాలనుకుంటున్నా. ముందుగా నా దర్శకత్వంలోనే "ఒక్క అడుగు" చిత్రం తెరకెక్కించబోతున్నాను. అవినీతిని పునాదులతో సహా పెకలించేయాలన్నది ఆ చిత్ర ప్రధాన కథాంశం. ఇందులో ప్రభాస్,నేను కలిసి నటిస్తున్నాం. అదే విధంగా కొత్త దర్శకులను ప్రోత్సహిస్తూ కొన్ని చిన్న చిన్న చిత్రాలను కూడా రూపొందించాలానే ఆలోచన ఉంది' అని అన్నారు. ప్రభాస్ గురించి మాట్లాడుతూ... ఓ నటుడికి ఎప్పుడో కానీ రాని అవకాశం ప్రభాస్ కు చాలా త్వరగా "బాహుబలి" చిత్రంతో వచ్చింది. ఈ సినిమా కోసం 2015 వరకు వేచి చూడాల్సిందే. ఆ తర్వాత ప్రభాస్ కు పెళ్లి చేయబోతున్నాం. కానీ ఇంకా అమ్మాయిని చూడటం మొదలు పెట్టలేదు. ప్రభాస్ తో "భక్త కన్నప్ప" సినిమాను నేనే రీమేక్ చేస్తాను" అని అన్నారు.