కిరణ్ పోతూ పోతూ పొగ పెడతాడా?
posted on Oct 23, 2013 10:18AM
రాష్ట్రాన్ని రెండు ముక్కలు చేస్తూ కాంగ్రెస్ హైకమాండ్ తీసుకున్న నిర్ణయాన్ని బాహాటంగా వ్యతిరేకిస్తున్న రాష్ట్ర ముఖ్యమంత్రి కిరణ్కుమార్రెడ్డి త్వరలో ముఖ్యమంత్రి పదవికి రాజీనామా చేసి సీమాంధ్రలో కొత్తపార్టీ పెట్టబోతున్నాడన్న వార్తలు వినిపిస్తున్నాయి. కాంగ్రెస్ పార్టీని విడిచిపెట్టి పోయేముందు అల్లాటప్పాగా పోకుండా కాంగ్రెస్ పార్టీకి పొగపెట్టి మరీ పోయేలా కిరణ్ ప్లాన్ చేస్తున్నాడని ఆయన సన్నిహిత వర్గాలు చెబుతున్నాయి. తెలంగాణ బిల్లు అసెంబ్లీకి వచ్చిన పక్షంలో బిల్లు అసెంబ్లీలో ప్రవేశపెట్టిన మొదటిరోజే కిరణ్ రాజీనామా చేసే అవకాశం ఉందట. ఆరోజు కిరణ్ అసెంబ్లీలో సుదీర్ఘంగా మాట్లడతారట. రాష్ట్రాన్ని విభజిస్తే వచ్చే సమస్యలను సుదీర్ఘంగా ఏకరువు పెట్టి, విభజన వాదులను, కాంగ్రెస్ హైకమాండ్ని ఘాటుగా విమర్శించి, తాను రాజీనామా చేస్తున్నట్టు ప్రకటించే అవకాశం ఉందట. రాజీనామా చేసిన వెంటనే రాజ్భవన్కి వెళ్ళి తన రాజీనామా లేఖను గవర్నర్కి సమర్పించే అవకాశం ఉందని సదరు వర్గాలు సెలవిస్తున్నాయి. తన రాజీనామాతో రాజకీయ సంక్షోభాన్ని సృష్టించి తెలంగాణ ప్రక్రియకు అడ్డంకులు కల్పించడంతోపాటు సీమాంధ్రలో కిరణ్ తన మైలేజ్ పెంచుకుంటారని వివరిస్తున్నారు. చూద్దాం ఏం జరుగుతుందో!