ఢిల్లీ ముఖ్యమంత్రి కేజ్రీవాల్, కేంద్రమంత్రి అరుణ్ జైట్లీ మధ్య మాటల యుద్ధం రోజు రోజుకూ పెరిపోతుంది. డీడీసీఏ (ఢిల్లీ క్రికెట్‌ అసోసియేషన్‌) వ్యవహారంలో ప్రస్తుతం కేంద్రమంత్రి అరుణ్ జైట్లీ ఆరోపణలు ఎదుర్కొంటున్న సంగతి తెలిసిందే. ఈ సందర్భంగా తనపై లేనిపోని ఆరోపణలు చేసి తనతోపాటు కుటుంబ పరువు తీసారని జైట్లీ పది కోట్లకు.. కేజ్రీవాల్ పై పరువు నష్టం దావా వేశారు. దీనికి కేజ్రీవాల్ స్పందించి.. ఇలాంటి కేసులతో తనను భయపెట్టలేరని.. అవినీతికి వ్యతిరేకంగా పోరాటం చేస్తాము.. డీడీసీఏ అక్రమాలపై నిగ్గు తేల్చేందుకు ఏర్పాటు చేసిన విచారణ సంఘం ముందు జైట్లీ హాజరై  ఆయన నిర్దోషిత్వాన్ని నిరూపించుకోవాలన్నారు. జైట్లీ వేసిన కేసును ప్రముఖ న్యాయవాది రామ్‌ జెత్మలానీ కేజ్రీవాల్ తరుపున వాదించనున్నారు. మరోవైపు ఆప్ నేతలు కూడా జైట్లీపై  ఫోర్జరీ, ప్రజాధనం దుర్వినియోగం, ఆర్థిక అక్రమాలకు పాల్పడ్డారని కేసు పెట్టే ఆలోచనలో ఉన్నట్టు తెలుస్తోంది.