తెలంగాణ రాష్ట్ర ముఖ్యమంత్రి కేసీఆర్ మెదక్ జిల్లా ఎర్రవల్లిలోని తన వ్యవసాయ క్షేత్రంలో వైభవంగా నిర్వహించిన అయుత మహా చండీయాగం ఆదివారం సాయంత్రం ముగిసింది. మఠాధిపతులు, మాన్యులు, సామాన్య ప్రజానీకం సమక్షంలో కేసీఆర్ తలపెట్టిన యాగం ఐదు రోజులపాటు వైభవంగా జరిగింది. రెండు వేల మంది రుత్వికులు ఈ యాగంలో పాల్గొన్నారు. యాగంలో చివరి క్రతువైన పూర్ణాహుతితో ఆదివారం సాయంత్రం ఐదు గంటలకు యాగం పరిపూర్ణమైంది. యాగం జరిగిన ఐదు రోజులూ ఎర్రవల్లి పరిసరాలు వేదఘోషతో ప్రతిధ్వనించాయి. యాగం చూసేందుకు తరలి వచ్చిన ప్రతి ఒక్కరూ సరికొత్త ఆధ్యాత్మిక అనుభూతికి లోనయ్యారు. ఈ యాగాన్ని తిలకించేందుకు అనేకమంది ప్రముఖులూ తరలి రావడం విశేషం.