దేశంలోనే భారీ స్థాయిలో బొగ్గు ఉత్పత్తి చేసే సింగరేణి గనులను తెలంగాణ ప్రభుత్వం పూర్తిగా తన సొంతం చేసుకోవడానికి ప్రయత్నాలు ప్రారంభించినట్టు తెలుస్తోంది. తెలంగాణ ముఖ్యమంత్రి కేసీఆర్ సింగరేణిలో వాటాని పెంచుకోవడం ద్వారా సింగరేణి గనుల మీద తెలంగాణ ప్రభుత్వం పూర్తి ఆధిపత్యం సాధించేలా చూడాలని భావిస్తున్నట్టు తెలుస్తోంది. సింగరేణిలో కేంద్ర ప్రభుత్వానికి ఉన్న 49 శాతం వాటాను కొనుగోలు చేసేందుకు కేసీఆర్ ప్రభుత్వం ప్రయత్నాలు ప్రారంభించింది. కేంద్ర ప్రభుత్వం ప్రకటించిన ‘వాటాల ఉపసంహరణ విధానం'ను లోతుగా అధ్యయనం చేసి, సింగరేణిలో ఉన్న కేంద్ర ప్రభుత్వ వాటాను కొనుగోలు చేసే అవకాశాలను పరిశీలించాలని కేసీఆర్‌ అధికారులను ఆదేశించారు. ఈ అంశం మీద కేసీఆర్అధికారులతో సుదీర్ఘ సమీక్ష సమావేశాన్ని నిర్వహించారు. ప్రస్తుతం సింగరేణి కాలరీస్‌లో రాష్ట్ర ప్రభుత్వానికి 51 శాతం, కేంద్ర ప్రభుత్వానికి 49 శాతం వాటా ఉంది.