హత్య కేసులో హీరోయిన్ అరెస్ట్

హత్య కేసులో ఓ కన్నడ హీరోయిన్ అరెస్టయింది. రేనాల్డ్ పీటర్ ప్రిన్స్ అనే నటుడిని హత్య చేసినందుకు ఆమెని చెన్నై పోలీసులు అరెస్టు చేశారు. కన్నడ సినిమాలలో నటించే శ్రుతికి బాగా డబ్బున్న వ్యక్తి, నటుడు, సినిమా ఫైనాన్షియర్ అయిన రేనాల్డ్ పీటర్ ప్రిన్స్‌తో పరిచయమైంది. అతని డబ్బు అంతా సొంతం చేసుకోవాలని ప్లాన్ చేసిన సినీ నటి శ్రుతి అచ్చం సినిమాల తరహాలోనే ప్లాన్ వేసి ప్రిన్స్‌ని చంపేసింది. మొదట అతన్ని పెళ్ళాడింది. కొంతకాలం కలసి జీవించిన తర్వాత అతన్ని ఓ నిర్మానుష్య ప్రదేశానికి తీసుకెళ్ళి చంపేసింది. శవాన్ని పాతిపెట్టేసింది. తర్వాత పోలీసులకు తన భర్త కనిపించడం లేదని ఫిర్యాదు చేసింది. పోలీసులు కేసు క్లోజ్ చేసిన తర్వాత ప్రిన్స్ భార్య హోదాలో అతని ఆస్తి మొత్తాన్నీ సొంతం చేసుకోవచ్చని ఆమె భావించింది. అయితే పోలీసులు తీగ లాగితే డొంకంతా కదిలింది. ప్రిన్స్‌ని శ్రుతే హత్య చేసిందని బయపడింది. ఆమెని చెన్నై పోలీసులు బెంగుళూరులో అరెస్టు చేశారు.