జేఎన్‌యూ విద్యార్థి నాయకులు కన్నయా కుమార్‌, ఉమర్‌ఖాలిద్‌లను విశ్వవిద్యాలయం నుంచి బహిష్కరించాలన్న సూచనలు వినిపిస్తున్నాయి. వీరితో పాటు మరో ముగ్గురు కూడా, ఓ వివాదాస్పద సమావేశాన్ని నిర్వహించినందుకు, వేటుని ఎదుర్కొనే అవకాశం ఉంది. ఈ విషయమై విచారణ జరిపిన ఒక ఉన్నతస్థాయి సంఘం, తన నిర్ణయాన్ని యూనివర్శిటీ నిర్వాహకులకు అందచేసినట్లు సమాచారం. ఈ విచారణలో భాగంగా ఆనాటి సమావేశంలో 21 మంది విద్యార్థుల పాత్రను పరిశీలించిన సంఘం, వారి మీద జరిమానా, బహిష్కరణ... తదితర చర్యలను సూచించిందట.

ఈ నివేదికను కనుక యథాతథంగా అంగీకరిస్తే, జేఎన్‌యూ మరోమారు భగ్గుమనే ప్రమాదం లేకపోలేదు. అందుకని నివేదికను అనుమతిస్తారా లేకపోతే విద్యార్థుల నుంచి తీసుకునే తుది వివరణతో సంతృప్తి చెందుతారా అన్నది త్వరలోనే తేలనుంది. కన్నయా కుమార్‌, ఉమర్‌ఖాలిద్‌లు మాత్రం తమ మీద ఎలాంటి చర్యలు తీసుకున్నా... వాటిని అంగీకరించే పరిస్థితిలో లేరు. కాబట్టి నివేదిక మీద చర్యలు ఎంత సాధారణంగా ఉన్నా, వివాదం మాత్రం అసాధారణంగానే రాజుకునే అవకాశం కనిపిస్తోంది.