జవహర్‌లాల్ నెహ్రూ విశ్వవిద్యాలయంలో జరిగిన సమావేశానికి సంబంధించి రోజుకో చిత్రం బయటపడుతోంది. అఫ్జల్‌గురుకి అనుకూలంగా సాగిన ఈ సమావేశంలో ‘కన్నయా కుమార్‌’ అనే విద్యార్థి నాయకుడు భారతదేశానికి వ్యతిరేకంగా నినాదాలు చేశాడన్నది ప్రధాన ఆరోపణ. ఈ అభియోగం మీదే ప్రస్తుతం కన్నయా దేశద్రోహం కేసుని ఎదుర్కొంటున్నాడు. అందుకు సాక్ష్యంగా గతవారం ఒక వీడియోను కూడా దేశవ్యాప్తంగా ఉన్న వార్తా ఛానళ్లు ప్రసారం చేసేశాయి. అందులో కన్నయా కశ్మీర్‌కు స్వాతంత్ర్యం కావాలని నినాదాలు చేస్తున్నట్లుగా వినిపించింది కూడా.

 

కానీ కన్నయా కోరుకుంది కశ్మీర్‌కి కాదనీ పేదరికం నుంచీ, ఆకలి నుంచీ, అవిద్య నుంచీ... స్వతంత్ర్యాన్ని కోరుతూ నినాదాలు చేశాడనీ రుజువు చేస్తూ మరో వీడియో బయటపడింది. దాంతో తమ తొందరపాటుకి పోలీసులు నాలుక కరుచుకుంటున్నారు. అసలు నిందితులను వదిలి వేసి కొసరు నాయకుడిని పట్టుకుని, ఇప్పుడు ఏం చేయాలో తోచక తలలు పట్టుకుంటున్నారు. వార్తా ఛానళ్లు కూడా కన్నయా గురించి వచ్చిన తప్పుడు వీడియోను ప్రసారం చేసి, దాని మీద వేడివేడి చర్చలు జరిపి, విద్యార్థి నాయకులను నానా తిట్లూ తిట్టి... ఇప్పుడు అది నకిలీ వీడియో అని తేలడంతో గమ్మున ఉండిపోయాయి.