చైనాకు బుద్ధి చెప్పే నాయకుడు ఈ ప్రపంచంలో లేడు: కేఏ పాల్
Published on: Thu Jun 18, 2020 2:29PM
భారత్-చైనా సరిహద్దులో నెలకొన్న ఉద్రిక్త పరిస్థితులపై కేఏ పాల్ స్పందించారు. చైనా గురించి తాను ఫిబ్రవరిలోనే చెప్పానని, మూడో ప్రపంచ యుద్ధం వస్తుందని ముందే చెప్పానని అన్నారు. కరోనా వైరస్ను వ్యూహన్ ల్యాబ్ నుంచి చైనా ఉద్దేశపూర్వకంగా పంపించిందని, ఈ విషయం ముందు చెప్పింది తానేనని అన్నారు. చైనా కరోనా వైరస్ ద్వారా ప్రపంచానికి తీవ్ర నష్టం కలిగించిందని పాల్ ఆరోపించారు. చైనాకు శాంతి అక్కర్లేదని, వాళ్లు యుద్ధాన్నే కోరుకుంటారని వ్యాఖ్యానించారు. ఇవాళ 20 మంది భారత సైనికులు చనిపోయారంటే కారణమేంటని ప్రశ్నించారు. చైనాకు బుద్ధి చెప్పే నాయకుడు ప్రపంచంలో లేకపోవడమే అనేక సమస్యలకు కారణమవుతోందని అభిప్రాయం వ్యక్తం చేశారు. అమెరికా అధ్యక్షుడు డొనాల్డ్ ట్రంప్ వైఖరి సరిగా లేదని, ఆయన చైనాతో తెరవెనుక వ్యాపారాలు చేస్తున్నారని పాల్ ఆరోపించారు. ట్రంప్ చైనా సహాయం కోరుతున్నారని తాను ఎప్పట్నించో చెబుతున్నానని, అలాగే రష్యా మద్దతు కూడా ఆయన తీసుకుంటున్నారని పాల్ వ్యాఖ్యానించారు.


