టాలీవుడ్ స్టార్ జూనియర్ ఎన్టీఆర్, లక్ష్మీ ప్రణతి దంపతులకు మంగళవారం ఉదయం 11 గంటలకు పండంటి మగపిల్లాడు పుట్టాడు. హైదరాబాద్‌లోని రెయిన్ బో హాస్పిటల్‌లో జూనియర్ ఎన్టీఆర్‌కి పుత్రోదయం అయింది. ఈ వార్త విని జూనియర్ ఎన్టీఆర్ అభిమానులందరూ ఉత్సాహంతో ఉరకలు వేస్తున్నారు. తాము అభిమానించే నందమూరి వంశంలో మరో అంకురం పుట్టిందని, తెలుగు సినిమా రంగానికి మరో ఫ్యూచర్ స్టార్ ఉదయించిందని అనుకుంటున్నారు. అయితే ఇప్పుడు నందమూరి వారి అభిమానులందరి మనసులలో ఒకటే ఎదురుచూపు వుంది.. అది ఏమంటంటే, అర్జెంటుగా జూనియర్ ఎన్టీఆర్ కొడుకుని కళ్ళారా చూసేయాలి. ఆ బుజ్జోడు ఎవరి పోలికో కనిపెట్టేయాలి. తాత నందమూరి తారక రామారావు పోలికలు పుణికి పుచ్చుకున్న జూనియర్ ఎన్టీఆర్‌కి స్టార్‌డమ్ రావడానికి ఆ పోలికలే కారణమయ్యాయి. ఇప్పుడు పుట్టిన నందమూరి వారసుడికి కూడా ముత్తాత పోలికలు వుంటే ఇక తమ ఆనందానికి అంతే వుండదని నందమూరి వంశాభిమానులు అంటున్నారు. ఎలాగూ జూనియర్ ఎన్టీఆర్ అందగాడు. లక్ష్మీ ప్రణతి అందం గురించి ప్రత్యేకంగా చెప్పాల్సిన అవసరమే లేదు. చూడ ముచ్చటైన ఈ జంటకు పుట్టిన బుజ్జిగాడు డెఫినెట్‌గా అదిరిపోయే అందగాడే అయి వుంటాడని, తమ హీరో వారసత్వాన్ని కొనసాగించేవాడు అవుతాడని అభిమానులు అనుకుంటున్నారు.