బాలీవుడ్ నటి జియాఖాన్ అంత్యక్రియలు అశ్రునయనాల మధ్య ముగిశాయి. కుటుంబ సభ్యులు, సన్నిహితులు ఆమెకు తుదివీడ్కోలు పలికారు. జూహులోని శ్మశానంలో ఆమె భౌతిక కాయాన్ని ఈ మధ్యాహ్నం 2 గంటలకు ఖననం చేశారు. జియా అంత్యక్రియలకు అమీర్ ఖాన్ భార్య కిరణ్ రావు, రితేష్ దేశ్ ముఖ్, ఆదిత్య పంచోలి తదితర ప్రముఖులు హాజరయ్యారు. 25 ఏళ్ల జియాఖాన్ సోమవారం రాత్రి ఉరేసుకుని ఆత్మహత్య చేసుకున్న సంగతి తెలిసిందే. జియాఖాన్ మృత దేహానికి వైద్యులు పోస్టుమార్టం పూర్తి చేసారు. వైద్యలు వెల్లడించిన నివేదిక ప్రకారం ఆమె ఉరి వేసుకోవడం వల్లనే చనిపోయిందని, ఇది ఆత్మ హత్యే అని ధృవీకరణ అయింది. రాత్రి 11 గంటల నుంచి 11.30 గంటల మధ్యలో ఆమె ప్రాణాలు వదిలినట్లు వైద్యులు తెలిపారు. దీంతో జియా ఖాన్ మరణంపై నెలకొన్న అనుమానాలకు తెర పడినట్లయింది.