ఉప ఎన్నికల తరువాత సిఎం కిరణ్ సర్కారులో మంత్రి పదవుల మార్పు ఉంటుందా? అదీ వై.కా.పా. అధినేత జగన్మోహనరెడ్డి అక్రమాస్తుల కేసులో నిందితులైన మంత్రులకు పదవులు ఊడతాయా? కొత్త మంత్రులు కొలువుతీరుతారా? దీనిలో మాజీ మంత్రి జెసి దివాకరరెడ్డికి మంత్రి పదవి వచ్చే అవకాశముందా? అన్న పలు ప్రశ్నలకు జెసి తడుముకోకుండా తనకు మాత్రం మంత్రి పదవి రావటం ఖాయమంటున్నారు. ఇటీవల కొంత కాలం అలిగి అమెరికా వెళ్లిపోయిన జెసి తిరిగి ప్రచారంలో పాల్గొంటున్నారు. ఇదేంటీ మీరొచ్చేశారు అని ప్రశ్నించటం పాపం! జెసి తనకు త్వరలో మంత్రి పదవి ఇస్తారు కాబట్టే తిరిగొచ్చానంటున్నారు. జగన్ ను వ్యతిరేకించే నేతగా ఈయనకు కాంగ్రెస్ గుర్తింపు ఇచ్చింది. నెలన్నర క్రితం అనంతపురం కాంగ్రెస్ సమన్వయ కమిటీ సభ్యత్వం కూడా వద్దన్న జెసి ఒక్కసారిగా ఎన్నికల ప్రచారంలో కనిపించటం అందరినీ ఆశ్చర్యానికి గురి చేస్తోంది. మంత్రి శైలజానాధ్, ఎంపి అనంతవెంకటరామయ్య, అనంత కాంగ్రెస్ అభ్యర్థి ముర్షీదాబేగంలతో కలిసి ఆయన ప్రచారంలో పాల్గొన్నారు. పచ్చగడ్డి వేస్తే భగ్గుమనే నాయకులతో ఈ ప్రచారం ఏమిటని ఆశ్చర్యపోతుంటే వీరు ముగ్గురూ కూడా ఎంతో సఖ్యతగా ఉన్నట్లు ఫోజులిచ్చారు. ఈ ఫోజుల తరువాతే జెసి తన మంత్రి పదవి స్టోరీ విప్పారు. దీనికి నేతలు అదంతా వట్టేదే ఇది జెసి స్టైలు మాత్రమే అని సమాధానమిస్తున్నారు.