స్పీకర్ అయ్యన్నకి జగన్ లేఖ... గొంతెమ్మ కోరికలు!
Published on: Tue Jun 25, 2024 2:18PM
ఆంధ్రప్రదేశ్ శాసనసభ స్పీకర్ చింతకాయల అయ్యన్న పాత్రుడికి మాజీ ముఖ్యమంత్రి, వైసీపీ ఎమ్మెల్యే లేఖ రాశారు. ఆరోపణలు, డిమాండ్లు, కమాండ్లు ఆ లేఖలో వున్నాయి. మొదట మంత్రులు ప్రమాణ స్వీకారం చేసిన తర్వాత తన చేత ప్రమాణ స్వీకారం చేయించారని, అది అసెంబ్లీ పద్ధతులకు విరుద్ధమని జగన్ తన లేఖలో పేర్కొన్నారు. ప్రతిపక్ష హోదా ఇవ్వాలంటే మొత్తం సీట్లలో 10 శాతం సీట్లు వచ్చి వుండాలన్న నిబంధన ఎక్కడా లేదని జగన్ లేఖలో చెప్పారు. ప్రతిపక్షంలో ఎవరికి ఎక్కువ స్థానాలు వుంటే ఆ పార్టీకే ప్రతిపక్ష హోదా ఇవ్వాలని అన్నారు. అయితే ఆంధ్రప్రదేశ్ అసెంబ్లీలో ఈ పద్ధతి పాటించలేదని లేఖలో అన్నారు. ‘‘అధికార కూటమి, స్పీకర్ ఇప్పటికే నామీద శత్రుత్వం ప్రదర్శిస్తున్నారు. జగన్ని చచ్చేదాకా కొట్టాలని స్పీకర్ మాట్లాడిన మాటలు వీడియోల ద్వారా బయటకి వచ్చాయి. ఇలాంటి పరిస్థితుల్లో అసెంబ్లీలో గొంతు విప్పే పరిస్థితులు కనిపించడం లేదు. ప్రతిపక్ష హోదాతోనే ప్రజా సమస్యలను బలంగా వినిపించేన అవకాశం వుంటుంది. ప్రతిపక్ష హోదాతో సభా కార్యక్రమాల్లో పాల్గొనేందుకు చట్టబద్ధమైన భాగస్వామ్యం లభిస్తుందని ఆశిస్తున్నాను. ఈ అంశాలను దృష్టిలో వుంచుకుని ఈ లేఖను పరిశీలించాల్సిందిగా అభ్యర్థిస్తున్నాను’’ అని స్పీకర్కి రాసిన లేఖలో జగన్ పేర్కొన్నారు.


