వై.కా.పా. అధినేత జగన్మోహనరెడ్డి అక్రమాస్తుల కేసులో మంత్రులను బలిపశువులుగా చూసేందుకూ కాంగ్రెస్ పార్టీ వెనుకాడటం లేదు. ఈ కుట్ర వల్ల తాము నియోజకవర్గాల చులకన అవటమే కాకుండా పార్టీని వదిలేసే పరిస్థితులు ఉత్పన్నమవుతాయని మంత్రులు కాంగ్రెస్ రాష్ట్ర వ్యాహారాల ఇన్ ఛార్జి గులాంనబీ ఆజాద్ ఎదుట ఆందోళన వ్యక్తం చేశారు. వైఎస్ ప్రభుత్వంలో జరిగిన తప్పులకు తమను బలిచేయడం ఎంత వరకూ సబబమని మంత్రులు ఆయన్ని నిలదీశారు. అంతేకాకుండా పార్టీకి, ప్రభుత్వానికి మధ్య వారధిగా ఉండాల్సిన నాయకులే తమను బలిపశువులను చేస్తే భవిష్యత్తులో మంత్రి పదవి ఇస్తామన్నా ఎవరూ ముందుకు రారని వారు స్పష్టం చేశారు. తమ విషయంలో కాంగ్రెస్ పార్టీ బలిపశువులను చేయాలనే నిశ్చయించుకుంటే తీవ్రపరిణామాలు ఎదురవుతాయని మంత్రులు సబితా ఇంద్రారెడ్డి, పొన్నాల లక్ష్మయ్య, గీతారెడ్డి, కన్నా లక్ష్మినారాయణ, ధర్మాన ప్రసాదరావు తదితరులు ఆజాద్ కు హెచ్చరించారు. వై.ఎస్. హయాంలో ఢిల్లీలోని కొందరు పెద్దలకు కూడా పెద్ద ఎత్తన ముడుపులు అందాయన్న విషయం అందరికి తెలిసిందేనని మరి వీరిని ఎందుకు వదిలేసి తమనే టార్గెట్ చేస్తున్నారని వారు ఆగ్రహంతో ప్రశ్నించినట్లు తెలిసింది. వై.ఎస్. హయాంలో ఆజాద్ కు కూడా ముడుపులు అందాయనే ప్రచారం జరిగింది. జగన్ పై కక్షతో పార్టీ అధిష్టానం ఆయనను ఇబ్బందులకు గురిచేయడమే గాక తమను కూడా ఇబ్బందులు పెడుతోందని, త్వరలో మరి కొందరు మంత్రులను సిబిఐ అరెస్ట్ చేయబోతున్నట్లు వస్తున్న వార్తలు తమను కలవర పెడుతున్నాయని మంత్రులు ఆజాద్ వద్ద ఆవేదన వ్యక్తం చేసినట్లు తెలిసింది.