సిబీఐ విచారణకు హాజరుకావాల్సి ఉన్నందున ఈ నెల 10,11 తేదీల్లో తనకు సెలవు ఇవ్వాలని శ్రీకాకుళం జిల్లా ఎన్నికల అధికారి కలెక్టర్ వెంకట్రామిరెడ్డి ఎన్నికల కమీషన్ ప్రధానాధికారి భంవార్ లాల్ ను కోరారు. ఇటీవల సిబీఐ తన నాలుగో ఛార్జిషీటులో కలెక్టర్ పేరును ఎ-5 గా జత చేసింది. తనకు మే 30వ తేదీన పంపించిన సమన్లు అందాయని వెంకట్రామిరెడ్డి వివరించారు. ఎన్నికల్లో జిల్లా ప్రధాన రిటర్నింగ్ అధికారిగా ఉన్న తనకు విచారణ నిమిత్తం రెండు రోజుల శెలవు మంజూరు చేయాలన్నారు. తమ జిల్లాలో నసరన్నపేట ఎన్నికలు సక్రమమైన రీతిలో జరిగేందుకు ఏర్పాట్లు చేశానని వివిరించారు. ఎన్నికల కమీషన్ అనుమతిస్తే జూన్ 11వ తేదీన సిబీఐ ఎదుట హాజరవుతానని కలెక్టర్ వెంకట్రామిరెడ్డి స్పష్టం చేశారు. జగన్ అక్రమాస్తుల కేసులో ఇప్పటి వరకూ ఐఎఎస్ అధికారులు శ్రీలక్ష్మి, బీపీ ఆచార్య సిబీఐ ఎదుట హాజరై ప్రస్తుతం చెంచల్ గూడ జైలులో ఉన్నారు. మూడో ఐఎఎస్ అధికారిగా వెంకట్రామిరెడ్డి విచారణకు సిద్ధమయ్యారు.