ఐసీస్ ఉగ్రవాద సంస్థ ఆగడాలు రోజురోజుకూ పెరిగిపోతున్నాయి. ఈ ఉగ్రవాద సంస్థను సాధ్యమైనంత త్వరగా నాశనం చేయాల్సిన అవసరం వుందనే విషయాన్ని ప్రపంచానికి గుర్తు చేసే ఘటన అల్‌రకా నగరంలో జరిగింది. అల్‌రకా నగరంలో బిడ్డకు పాలిచ్చిందనే నేరం మీద ఐసీస్ ఉగ్రవాదులు ఒక మహిళను దారుణంగా హింసించి, ఆ తర్వాత బహిరంగంగా కాల్చి చంపారు. సరుకుల కొనుగోలు కోసం నెలల శిశువుతో కలసి బయటకి వచ్చిన ఒక మహిళ మధ్యలో తన బిడ్డ ఆకలితో ఏడవటంతో ఒక చెట్టు పక్కకి వెళ్ళి పాలిచ్చింది. దీనిని ఐసీస్ అనుబంధ మహిళా ఉగ్రవాద సంస్థ అయిన అల్‌ఖన్సా సభ్యులు గమనించారు. ఐసీస్ ఉగ్రవాదుల నిబంధనల ప్రకారం బహిరంగ ప్రదేశాలలో తల్లులు బిడ్డలకు పాలు ఇవ్వడం నేరం. ఈ నేరం మీద సదరు మహిళ నుంచి బిడ్డను లాక్కున్నారు. ఆమెను దారుణంగా హింసించిన అనంతరం బహిరంగంగా కాల్చి చంపారు.