పోచమ్మతల్లి విగ్రహం మసకబారింది. అందుకే భూకంపం భయం వెంటాడుతోంది. అమ్మతల్లి విగ్రహానికి నోటిదగ్గర రంధ్రం పడింది. అందుకే పుకార్లు షికార్లు చేస్తున్నాయి.. ఇది.. ఆదిలాబాద్ జిల్లా ఇందిరాయి వాసుల నమ్మకం. ఆ భయంతోనే ఆలయంలో ఈ మధ్యే హోమం కూడా జరిపించారు. ఈ ప్రత్యేక పూజలకు జైనూర్, సిర్పూర్ గిరిజనులు తండోపతండాలుగా తరలివచ్చారు. పూజలతోపాటుగా మూడు గ్రామాల శుద్ధి కార్యక్రమంకూడా.. మూడురోజులపాటు మూకుమ్మడిగా ఉపవాసాలు చేస్తూ మూడూళ్లలో ఉన్న ఆలయాల్ని పరిశుభ్రం చేస్తారు. వీటికోసం తలకింత వేసుకుని కావాల్సిన డబ్బుని పోగుచేసుకున్నారు. ప్రత్యేకంగా పూజలకోసం ఒక్కో గిరిజనుడూ రూ. 25 సమర్పించుకున్నారు. కార్యక్రమం అంతా పూర్తయ్యాక ఆగస్ట్ 27న ఉపవాస విరమణ. తరతరాలుగా వస్తున్న నమ్మకాలే తమ తలరాతల్ని మారుస్తున్నాయని ఇప్పటికీ గిరిజనులు బలంగా నమ్ముతున్నారు.