భారతదేశ అంతరిక్ష శాస్త్రవేత్తలు కంటున్న కల నిజమైంది. అంగారక గ్రహం కక్ష్యలోకి ఇస్రో ప్రయోగించిన మార్స్ ఆర్బిటల్ మిషన్ (మామ్) మార్స్ కక్ష్యలోకి దిగ్విజయంగా ప్రవేశించింది. ఈ పరిణామంతో భారత అంతరిక్ష పరిశోధన చరిత్రలో మరో అద్భుతమైన ఘట్టం నమోదైంది. మార్స్ (అరుణ గ్రహం, మంగళ గ్రహం) గ్రహానికి ఉపగ్రహాన్ని ప్రవేశపెట్టిన నాలుగో దేశంగా భారతదేశం నమోదైంది. అలాగే ఆసియాలోనే ఈ ఘనతను సాధించిన మొదటి దేశంగా, మొదటి ప్రయత్నంలోనే అంగారక గ్రహ కక్ష్యలో ఉపగ్రహాన్ని ప్రవేశపెట్టిన తొలి దేశంగా ఘనతను సాధించింది. బుధవారం నాడు మామ్‌ని అంగారక కక్ష్యలోకి ప్రవేశపెట్టే ప్రక్రియలో భాగంగా ఇస్రో శాస్త్రవేత్తలు మామ్‌లోని లిక్విడ్ ఎమినిది దశల్లో ఇంజన్‌ని మండించారు. మామ్‌లోని అన్ని ఇంజన్లూ సక్రమంగా పనిచేస్తున్నాయని నిర్ధారించుకున్న తర్వాత క్షణానికి 22 కిలోమీటర్ల వేగం నుంచి 4 కిలోమీటర్ల వేగానికి మామ్‌ని తగ్గించారు. ఆ తర్వాత మామ్‌ని అంగారక గ్రహ కక్ష్యలోకి విజయవంతంగా ప్రవేశపెట్టారు. అనంతరం ప్రయోగం విజయవంతం కావడంతో ఇస్రో శాస్త్రవేత్తలందరూ హర్షధ్వానాలు చేశారు. ఈ ప్రయోగం మొత్తాన్ని బెంగుళూరులోని ఇస్రో కార్యాలయంలో కూర్చుని తిలకించిన ప్రధాని నరేంద్ర మోడీ ఇస్రో శాస్త్రవేత్తలను అభినందించారు. ఇది భారత అంతరిక్ష చరిత్రలోనే అద్భుతఘట్టమని, ఒక హాలీవుడ్ సినిమా నిర్మాణ వ్యయం కంటే తక్కువ వ్యయంతో ప్రపంచం ముందు భారతదేశం తలెత్తుకుని నిలబడగలిగే స్థాయి విజయాన్ని ఇస్రో శాస్త్రవేత్తలు సాధించారని ఆయన అన్నారు. అంగారక గ్రహంపై పంపిన ఉపగ్రహం విజయం సాధించడం పట్ల ఆంధ్రప్రదేశ్ ముఖ్యమంత్రి నారా చంద్రబాబు నాయుడు సంతోషాన్ని వ్యక్తం చేశారు. ఇస్రో శాస్త్రవేత్తలకు అభినందనలు తెలిపారు. అంగారక గ్రహ కక్ష్యలోకి ప్రవేశించిన ఉపగ్రహం మధ్యాహ్నం పన్నెండున్నల తర్వాత మార్స్ గ్రహ తొలి ఫొటోను భూమికి పంపించనున్నట్టు తెలుస్తోంది. అలాగే భారత రాష్ట్రపతి ప్రణబ్ ముఖర్జీ కూడా ఒక ప్రకటనలో ఇస్రో శాస్త్రవేత్తలను అభినందించారు. ఇది ఒక చారిత్రక ఘట్టమని ఆయన పేర్కొన్నారు.