భారత స్టాక్ మార్కెట్ పెట్టుబడిదారులకు రాబోయే రోజుల్లో భారీ లాభాల పండగ రాబోతోంది. దేశీయ మార్కెట్లలో సరికొత్త సంచలనం సృష్టిస్తూ ఇనీషియల్ పబ్లిక్ ఆఫరింగ్స్ (IPO) బూమ్ ఊపందుకోనుంది. ప్రముఖ కన్సల్టింగ్ సంస్థ 'రెడ్‌సీర్' తాజా నివేదిక ప్రకారం, రాబోయే 24 నెలల్లో సుమారు 210 కొత్త తరం కంపెనీలు పబ్లిక్ లిస్టింగ్ కోసం సిద్ధమవుతున్నాయి. దేశంలోని నూతన తరం (New-age) కంపెనీల వృద్ధి ఏ స్థాయిలో ఉందో ఈ గణాంకాలు స్పష్టం చేస్తున్నాయి. ప్రస్తుత జూలై నాటికి ఈ కొత్త తరం లిస్టెడ్ కంపెనీల మొత్తం మార్కెట్ క్యాపిటలైజేషన్ 150 బిలియన్ డాలర్లుగా ఉంటే, అది రాబోయే 2030 నాటికి ఏకంగా 1 ట్రిలియన్ డాలర్లకు చేరుకుంటుందని ఈ నివేదిక అంచనా వేసింది.

ఈ భారీ మార్పుల కారణంగా వచ్చే దశాబ్దం ముగిసే సమయానికి భారత ఈక్విటీ మార్కెట్‌లో కొత్త తరం కంపెనీల వాటా ప్రస్తుతమున్న 3 శాతం నుండి 11.5 శాతానికి విపరీతంగా పెరుగుతుంది. ప్రపంచవ్యాప్తంగా ప్రధాన ప్లాట్‌ఫారమ్‌లపై నిధుల సమీకరణ విషయంలో మన దేశం మూడవ స్థానంలో నిలవడమే కాకుండా, వృద్ధి రేటు విషయంలో ప్రపంచంలోనే మొదటి స్థానంలో దూసుకుపోతోంది. ఒకప్పుడు ఐపీఓ మార్కెట్ కేవలం కంపెనీల వృద్ధిని మాత్రమే చూసేది, కానీ ఇప్పుడు ఇన్వెస్టర్లు స్థిరమైన మరియు లాభదాయకమైన వృద్ధిని కోరుకుంటున్నారు. ప్రస్తుత మార్కెట్ కూడా అదే బాటలో నడుస్తోంది.

మన దేశీయ సంస్థలే ఇప్పుడు ఈ కొత్త తరం కంపెనీలకు ప్రధాన కొనుగోలుదారులుగా మారడం విశేషం. భారతీయ ఇన్వెస్టర్లు, సంస్థలు స్థానిక స్టార్టప్‌లపై గట్టి నమ్మకంతో పెట్టుబడులు పెడుతున్నారు. దీనికి నిదర్శనంగా మార్కెట్లో లిస్ట్ అయిన 20 కంపెనీలలో 14 కంపెనీలు ప్రస్తుతం లాభాల్లో నడుస్తున్నాయి. గత ప్రైవేట్ రౌండ్ల ధరల ఆధారంగా కాకుండా, మార్కెట్లో ఇప్పటికే ఉన్న అదే తరహా లిస్టెడ్ కంపెనీల పనితీరు ఆధారంగా కొత్త ఐపీఓల ధరలను నిర్ణయిస్తున్నారు. దీనివల్ల లిస్టింగ్ సమయంలో కంపెనీ చేసుకునే సన్నాహాలు, భవిష్యత్తులో వచ్చే రాబడులను పెట్టుబడిదారులు మరింత ఖచ్చితంగా అంచనా వేయడానికి వీలవుతుంది.

గత ఏడాది మొత్తంతో పోలిస్తే, 2026 క్యాలెండర్ సంవత్సరం ద్వితీయార్థంలోనే (సెకండ్ హాఫ్) అత్యధిక నిధులు సమీకరించబడతాయని మార్కెట్ నిపుణులు భావిస్తున్నారు. కేవలం ఈ ఆరు నెలల కాలంలోనే మార్కెట్ నుండి 19 బిలియన్ డాలర్ల నుండి 22 బిలియన్ డాలర్ల వరకు భారీ నిధులు సేకరించే అవకాశం ఉంది. పబ్లిక్ మార్కెట్లలోకి అడుగుపెట్టడానికి సిద్ధంగా ఉన్న 200కు పైగా కంపెనీలలో, 150 కంటే ఎక్కువ కంపెనీలు ఇప్పటికే మార్కెట్ నియంత్రణ సంస్థ అయిన సెబీ (SEBI) నుండి అధికారికంగా అనుమతులు పొందడం విశేషం.

upcoming 210 ipos market updates,redseer indian stock market report.