పతంగుల పండుగ.. మాంజా వినియోగించినా, విక్రయించినా జైలే.. సజ్జనార్
Published on: Mon Jan 12, 2026 12:30PM

పర్యావరణానికి, ప్రజల ప్రాణాలకూ ముప్పుగా పరిణమించిన చైనా మాంజాపై హైదరాబాద్ నగర పోలీసులు ఉక్కుపాదం మోపుతున్నారు. సంక్రాంతి సంక్రాంతి పండుగను పతంగుల పండుగా కూడా జరుపుకుంటారు. ఈ పతంగులు ఎగురవేసే విషయంలో చిన్నా పెద్దా అన్న తేడా లేకుండా ఉత్సాహంగా పాల్గొంటారు. అయితే పతంగులను ఎగురవేయడానికి ఉపయోగిస్తున్న చైనా మాంజాపై నిషేధం ఉన్నా.. ఎవరూ పెద్దగా పట్టించుకోని పరిస్థితి ఉంది. ముఖ్యంగా పతంగులు ఎగురవేయడానికి దారం బదులుగా ఉపయోగించే చైనా మాంజా వల్ల పలు ప్రమాదాలు జరుగుతున్నాయి.
మనుషుల ప్రాణాలకే కాకుండా పక్షులకూ ఇది పెనుముప్పుగా పరిణమిస్తున్నది. ఈ నేపథ్యంలోనూ హైదరాబాద్ పోలీసులు చైనా మాంజా వినియోగం, విక్రయాలపై కఠిన చర్యలు తీసుకుంటున్నారు. ఇదే విషయాన్ని హైదరాబాద్ పోలీస్ కమిషనర్ సజ్జనార్ సామాజిక మాధ్యమ వేదిక ఎక్స్ లో చేసిన పోస్టులో పతంగులు ఎగరేయడానికి ఎవరైనా చైనా మాంజా వినియోగిస్తే కఠిన చర్యలు తప్పవని హెచ్చరించారు.
అలాగే చైనా మాంజా విక్రయించేవారిపైనా కఠిన చర్యలు తప్పవని స్పష్టం చేశారు. చైనా మాంజా వినియోగం, విక్రయాలను సమూలంగా నిలిపివేయాలన్న లక్ష్యంతో గత కొన్ని రోజులుగా హైదరాబాద్ లో విస్తృత తనిఖీలు నిర్వహిస్తున్నట్లు చెప్పారు. ఈ నెల 8 నుంచి 11వ తేదీ వరకు జరిగిన దాడులలో దాదాపు 43 లక్షల రూపాయల విలువైన 2,150 మాంజా బాబిన్లను సీజ్ చేసినట్లు తెలిపారు.
నిషేధిత మాంజాను విక్రయాలకు సంబంధించి 29 కేసులు నమోదు చేసి.. 57 మందిని అరెస్ట్ చేసినట్లు తెలిపారు. ఇక గత నెల రోజులలో మాంజా విక్రయం, వినియోగం కు సంబంధించి 132 కేసులు నమోదు చేసినట్లు తెలిపిన సజ్జనార్.. ఇందుకు సంబంధించి .68 కోట్ల విలువైన 8,376 మాంజా బాబిన్లను స్వాధీనం చేసుకొన్నామనీ, మొత్తం 200 మందిని అరెస్ట్ చేసినట్లు వివరించారు.


