పార్లమెంట్‌లో ఇక నుంచి రుచికరమైన ఘుమఘుమలాడే హైదరాబాద్ బిర్యాని లభించబోతోంది. సమావేశాలు జరిగే సమయంలో పార్లమెంటు సభ్యులు ఎంచక్కా హైదరాబాద్ బిర్యానీ తినొచ్చు. హైదరాబాద్ బిర్యానీని పార్లమెంటు క్యాంటీన్ మెనులో చేర్చాలని పార్లమెంటరీ ఫుడ్ మేనేజ్‌మెంట్ కమిటీ చైర్మన్‌గా బాధ్యతలు స్వీకరించిన తెలంగాణ రాష్ట్ర సమితి ఎంపీ జితేందర్ రెడ్డి నిర్ణయించారు. పార్లమెంటులో హైదరాబాదీ బిర్యానీతో పాటు మిర్చి కా సాలన్, షాయి తుకడా, ఖుబానీ కా మీఠా వంటి కొత్త వంటకాలను ప్రవేశపెడతామని తెలిపారు. పార్లమెంటులోని వంట వారికి హైదరాబాదులోని నిజాం క్లబ్‌లో ప్రత్యేకంగా శిక్షణ ఇప్పించనున్నట్లు ఎంపీ జితేందర్‌రెడ్డి తెలిపారు.