వాహనాల రిజిస్ట్రేషన్ పేరిట పౌరులను ఎందుకు వేధిస్తున్నారని హైకోర్టు ధర్మాసనంతెలంగాణ రాష్ట్ర ప్రభుత్వాన్ని ప్రశ్నించింది. ఆంధ్రప్రదేశ్, తెలంగాణ రాష్ట్రాలకు ఉమ్మడి రాజధానిగా వున్న హైదరాబాద్ నగరంతోపాటు తెలంగాణలోని వాహనాలన్నిటి నంబర్ ప్లేట్లు అన్నీ ‘ఏపీ’ నుంచి ‘టీఎస్’ అని మార్చాలని తెలంగాణ ప్రభుత్వం ప్రయత్నిస్తున్న విషయం తెలిసిందే. ఈ విషయం మీద కొందరు కోర్టును ఆశ్రయించారు. ఈ కేసును విచారిస్తున్న హైకోర్టు ధర్మాసనం తెలంగాణలో నంబర్ ప్లేట్ల రీ రిజిస్ట్రేషన్ ప్రక్రియపై స్టే విధించింది. తమ అనుమతి లేకుండా ఎలాంటి నిర్ణయం తీసుకోవద్దని ప్రభుత్వాన్ని ఆదేశించింది. ఈ సందర్భంగా హైకోర్టు ధర్మాసనం తెలంగాణ ప్రభుత్వం మీద పలు ప్రశ్నల్ని సంధించింది. చట్టాన్ని రూపొందించకుండా పాత రిజిస్ట్రేషన్లు ఎలా మారుస్తారు? రీ రిజిస్ట్రేషన్ పేరిట పౌరుల్ని ఎందుకు వేధిస్తున్నారు? అధికారం ఉంది కదా అని ఏది చేసినా నడుస్తుందని అనుకుంటున్నారా? అని ధర్మాసనం ప్రశ్నించింది.