ముంబైకి చెందిన ప్రముఖ చిత్రకారిణి హేమ ఉపాధ్యాయ్, ఆమె లాయర్ హరీష్ భంభానీ కొద్ది రోజుల క్రితం హత్యకు గురైన విషయం తెలిసిందే. ఈ కేసులు హేమ భర్త, చిత్రకారుడు చింతన్ ఉపాధ్యాయ్‌ని నిందితుడిగా గుర్తిస్తూ పోలీసులు అరెస్టు చేశారు. అరెస్టు తర్వాత పోలీసులు తమదైన శైలిలో చింతన్‌ను విచారించగా, కోర్టు కేసులు వదిలించుకోవడానికే హేమను హత్య చేశానని చింతన్ ఒప్పుకున్నాడు. చిత్రకారులైన ఈ దంపతుల మధ్య గత కొన్నేళ్ళుగా గొడవలు జరుగుతున్నాయి. 2013 సంవత్సరంలో హేమా ఉపాధ్యాయ్ చింతన్ ఉపాధ్యాయ్ మీద కేసు పెట్టింది. అప్పటి నుంచి అతన్ని కోర్టు చుట్టూ తిప్పుతోంది. కోర్టు కేసుతో విసుగెత్తిపోయిన చింతన్ తన భార్యను చంపడం ద్వారా కేసుల నుంచి తప్పించుకుందామని అనుకున్నాడు. దానికోసం విద్యాధర్ అనే వ్యక్తితో ప్లాన్ వేశాడు. ఆ ప్లాన్ ప్రకారం విద్యాధర్ హేమకు ఫోన్ చేశాడు. చింతన్ నుంచి విడాకులు తీసుకోవడానికి ఉపకరించే ఆధారాలు తన దగ్గర వున్నాయని, తాను నివసించే వేర్‌హౌస్ ప్రాంతానికి వస్తే వాటిని ఇస్తానని చెప్పాడు. దాంతో హేమ తన లాయర్ హరీష్‌తో కలసి వేర్‌హౌస్ ప్రాంతంలోవున్న విద్యాధర్ ఇంటికి వెళ్ళింది. అక్కడ విద్యాధర్ వాళ్ళిద్దర్నీ హత్యచేసి, మృతదేహాలను అట్టపెట్టెల్లో కుక్కి చెత్త కుండీల దగ్గర పారేశాడు. హేమ హత్య విషయం బయట పడిన తర్వాత చింతన్ ఉపాధ్యాయ్ అమాయకుడిలాగా భోరుభోరున ఏడ్చాడు. అయితే చివరికి అతనే హత్యకు కారణమని బయటపడింది.