ఏ పోరు అయినా తట్టుకోవచ్చుగానీ, సవతి పోరు మాత్రం తట్టుకోలేం. మధ్యప్రదేశ్‌లోని ఇండోర్‌లో శ్రవణ్ యాదవ్‌ అనే మగపురుషుడు బుద్ధి గడ్డితిని రెండు పెళ్ళిళ్ళు చేసుకున్నాడు. మొదట సోను అనే యువతిని పెళ్ళి చేసుకున్న శ్రవణ్ ఆ తర్వాత ఆర్తి అనే మరో యువతిని కూడా పెళ్ళి చేసుకున్నాడు. తన ఇద్దరూ భార్యలూ అక్కా చెల్లెళ్ళలాగా కలసి మెలసి వుంటారని పాపం జీవుడు ఆశించాడు. కానీ ఇక్కడ నేచురల్‌గానే సీన్ రివర్స్ అయింది. సవతులు కలసి వున్నట్టు ఎక్కడైనా చరిత్రలో వుందా... ఇక్కడా అదే జరిగింది. తెల్లారిందంటే చాలు సోను, ఆర్తి జుట్టూ జుట్టు పట్టుకుని కొట్టుకుంటూ వుండేవారు. ఎందుకొచ్చిన గొడవ అని ఇద్దర్నీ వేరువేరు ఇళ్ళలో వుంచినా వీరి మధ్య గొడవలు తగ్గలేదు. బుధవారం ఆర్తి సోను ఇంటికి వచ్చింది. రావడం కూడా ఖాళీ చేతులతో రాకుండా బాగా మరిగిన నూనెని తీసుకుని మరీ వచ్చింది. రావడం రావడం సోను మీద ఆ నూనెని పోసింది. వేడివేడి నూనె పడటంతో సోనుతోపాటు ఆమె కుమార్తె కూడా తీవ్రంగా గాయపడింది. సోను ఆర్తి మీద, భర్త శ్రవణ్ మీద కేసు పెట్టింది. దాంతో ఇద్దరూ పరారీలో వున్నారు.