దేశంలోనే అతిపెద్ద ప్రైవేట్ రంగ బ్యాంక్ అయిన హెచ్‎డీఎఫ్‎సీ బ్యాంక్ (HDFC Bank) రుణగ్రహీతలకు ఊహించని షాక్ ఇచ్చింది. తన మార్జినల్ కాస్ట్ ఆఫ్ ఫండ్స్-బేస్డ్ లెండింగ్ రేట్స్ (MCLR) అంటే కనీస రుణ వడ్డీ రేట్లను సవరిస్తూ బ్యాంక్ కీలక నిర్ణయం తీసుకుంది. రిజర్వ్ బ్యాంక్ ఆఫ్ ఇండియా (RBI) రెపో రేటును 5.25 శాతం వద్ద యథాతథంగా ఉంచిన నేపథ్యంలో, హెచ్‎డీఎఫ్‎సీ బ్యాంక్ గడిచిన నెలలో ఎంసీఎల్ఆర్ రేట్లను 10 బేసిస్ పాయింట్ల వరకు పెంచింది. తాజాగా మరోసారి కొన్ని నిర్దిష్ట కాలపరిమితులపై వడ్డీ రేట్లను పెంచుతూ నిర్ణయం తీసుకుంది. ఈ సవరించిన కొత్త వడ్డీ రేట్లు 2026 జూలై 7వ తేదీ నుంచి అధికారికంగా అమల్లోకి వచ్చాయి.

ఈ తాజా మార్పుల ప్రకారం బ్యాంక్ తన ఓవర్‌నైట్ (ఒక రోజు) రుణ రేటుపై మాత్రం స్వల్ప ఉపశమనం కల్పించింది. ఓవర్‌నైట్ లోన్లపై ఎంసీఎల్ఆర్ రేటును 8.10 శాతం నుండి 5 బేసిస్ పాయింట్లు తగ్గించి 8.05 శాతానికి చేర్చింది. అలాగే ఒక నెల, మూడు నెలలు, ఆరు నెలలు, మరియు రెండేళ్ల కాలపరిమితి కలిగిన ఎంసీఎల్ఆర్ వడ్డీ రేట్లలో ఎలాంటి మార్పులు చేయలేదు. ఇవి వరుసగా 8.05 శాతం, 8.20 శాతం, 8.35 శాతం, మరియు 8.55 శాతం వద్ద స్థిరంగా కొనసాగుతున్నాయి. అయితే ఎక్కువ మంది వినియోగదారులు తీసుకునే ఒక సంవత్సరం కాలపరిమితి లోన్లపై వడ్డీ రేటును 8.40 శాతం నుండి 8.45 శాతానికి పెంచేసింది. దీనితో పాటు మూడేళ్ల కాలపరిమితి గల ఎంసీఎల్ఆర్ వడ్డీ రేటును కూడా 8.65 శాతం నుండి 8.70 శాతానికి పెంచుతూ నిర్ణయం తీసుకుంది.

ఈ సవరణల ఫలితంగా హెచ్‎డీ,ఎఫ్‎సీ బ్యాంక్ యొక్క మొత్తం ఎంసీఎల్ఆర్ పరిధి ఇప్పుడు కాలపరిమితిని బట్టి 8.05 శాతం నుండి 8.70 శాతం మధ్య ఉండబోతోంది. ఒక సంవత్సరం లేదా మూడేళ్ల కాలపరిమితితో హోమ్ లోన్, కార్ లోన్ లేదా పర్సనల్ లోన్లు తీసుకున్న పాత, కొత్త రుణగ్రహీతలపై ఈ ప్రభావం నేరుగా పడనుంది. వారి నెలవారీ సమాన వాయిదాలు (EMI) పెరిగే అవకాశం స్పష్టంగా కనిపిస్తోంది. అయితే ఈ మార్పులు కేవలం ఎంసీఎల్ఆర్ (MCLR) విధానానికి అనుసంధానమై ఉన్న రుణాలకు మాత్రమే వర్తిస్తాయి. మార్జినల్ కాస్ట్ ఆఫ్ ఫండ్స్-బేస్డ్ లెండింగ్ రేట్ అనేది 2016 ఏప్రిల్ నెలలో రిజర్వ్ బ్యాంక్ ఆఫ్ ఇండియా ప్రవేశపెట్టిన ఒక పారదర్శక అంతర్గత ప్రామాణిక రేటు. పాత బేస్ రేట్ విధానం స్థానంలో వడ్డీ రేట్ల బదిలీని మరింత పారదర్శకంగా మార్కెట్‌కు అనుసంధానించే లక్ష్యంతో దీన్ని తీసుకువచ్చారు.

మరోవైపు హెచ్‎డీఎఫ్‎సీ బ్యాంక్ తన బెంచ్‌మార్క్ ప్రైమ్ లెండింగ్ రేటు (BPLR)ను సంవత్సరానికి 17.20 శాతానికి తగ్గించింది, ఇది జూన్ 24 నుంచే అమలులోకి రావడం గమనార్హం. ఇక ఫిక్స్‌డ్ డిపాజిట్ల (FD) విషయానికి వస్తే, బ్యాంక్ సాధారణ కస్టమర్లకు కాలపరిమితిని బట్టి 2.75 శాతం నుండి 6.50 శాతం వరకు వడ్డీని అందిస్తోంది. అదే సమయంలో సీనియర్ సిటిజన్లకు ప్రత్యేకంగా 3.25 శాతం నుండి గరిష్టంగా 7.00 శాతం వరకు వడ్డీ రేట్లను చెల్లిస్తోంది. లోన్ రేట్లు పెరగడంతో వినియోగదారులు తమ ఆర్థిక ప్రణాళికలను సరిచూసుకోవాల్సిన అవసరం ఎంతైనా ఉంది.