హరికృష్ణ రాజీనామా వెనుక పురందేశ్వరి
posted on Aug 26, 2013 12:10PM
టిడిపి పార్టీ మాజీ ఎంపీ హరికృష్ణ రాజీనామా వెనుక కేంద్ర మంత్రి, ఆయన సోదరి పురందేశ్వరి హస్తం ఉందన్న ఆరోపణలను ఎమ్మెల్యే, పురందేశ్వరి భర్త దగ్గుబాటి వెంకటేశ్వరరావు ఖండించారు. హరికృష్ణ రాజీనామా వెనక పురంధేశ్వరి హస్తం ఉందని టీడీపీ నేత కేఈ కృష్ణమూర్తి ఆరోపణలు చేసిన నేపథ్యంలో ఆయన స్పందించారు. '' హరికృష్ణ ఎప్పుడు ఏం చేస్తారో అందరికీ తెలిసిన విషయమే. ఆయన ఇప్పుడు రాజ్యసభ సభ్యత్వానికి రాజీనామా చేసి సమైక్యాంధ్ర జై కొడితే ఆయన రాజీనామా వెనక ఆయన సోదరి పురంధేశ్వరి హస్తం ఉందని ప్రచారం చేయడం చాలా తప్పు. అలాంటి అవసరం మాకు లేదు. అనవసరంగా ఇటువంటి ఆరోపణలు చేయడం మానుకోవాలి'' అని పురంధేశ్వరి భర్త, ఎమ్మెల్యే దగ్గుబాటి వెంకటేశ్వరరావు అన్నారు. టిడిపి ఎమ్మెల్సీ నన్నపనేని రాజకుమారి కూడా కె.ఇ.వాదనతో విబేధించడం విశేషం.హరికృష్ణ సమైక్యం కోసం రాజీనామా చేశారని, దీని వెనుక ఎవరో ఉన్నారని అనుకోవడం లేదని ఆమె అన్నారు.