ఐపీఎల్ 2026 సీజన్ లో చెన్నై సూపర కింగ్స్ ప్రస్థానం ముగిసింది. గురువారం అహ్మదాబాద్ వేదికగా గుజరాత్ టైటాన్స్ తో జరిగిన మ్యాచ్ లో పరాజయం పాలై ప్లేఆఫ్ రేసు వైదొలగింది.   ఈమ్యాచ్ లో గుజరాత్ టైటాన్స్ ఆల్‌రౌండ్ ప్రదర్శనతో అదరగొట్టింది. ఈ  విజయంతో గుజరాత్ టైటాన్స్ జట్టు  టాప్-2 స్థానం దాదాపుగా ఖాయం చేసుకుంది.  

 టాస్ ఓడి మొదట బ్యాటింగ్‌కు దిగిన గుజరాత్ టైటాన్స్ జట్టుకు ఓపెనర్లు శుభ్‌మన్ గిల్, సాయి సుదర్శన్   అద్భుతమైన ఆరంభాన్ని ఇచ్చారు.  అత్యంత కీలకమైన ఈ మ్యాచ్‌లో గిల్ కేవలం 37 బంతుల్లో 64 పరుగులు చేసి కెప్టెన్ ఇన్నింగ్స్ ఆడాడు. అలాగే  సాయి సుదర్శన్  53 బంతుల్లోనే 84 పరుగులతో చెన్నై బౌలర్లను ఓ ఆటాడుకున్నాడు.  మొదటి వికెట్‌కు వీరిరువురూ   నూటపాతిక  పరుగుల భారీ భాగస్వామ్యాన్ని నెలకొల్పి గుజరాత్ భారీ స్కోరుకు గట్టి పునాది వేశారు. ఆ తర్వాత   జాస్ బట్లర్ ఆకాశమే హద్దుగా చెలరేగి  కేవలం 27 బంతుల్లోనే 5 ఫోర్లు, 4 భారీ సిక్సర్లతో 57 పరుగులు చేసి అజేయంగా నిలిచాడు. దీంతో గుజరాత్ టైటాన్స్ నిర్ణీత 20 ఓవర్లలో 4 వికెట్ల నష్టానికి 229 పరుగుల భారీ   స్కోరు  సాధించింది.

  230 పరుగుల భారీ లక్ష్య ఛేదనతో బరిలోకి దిగిన చెన్నై సూపర్ కింగ్స్ జట్టుకు ఆదిలోనే కోలుకోలేని షాక్ తగిలింది. ఇన్నింగ్స్ తొలి బంతికే సంజూ శాంసన్ డకౌట్ రూపంలో వెనుదిరిగాడు. ఆ తర్వాత కెప్టెన్ రుతురాజ్ గైక్వాడ్ 16 పరుగులు చేసి ఔటయ్యాడు. గుజరాత్ స్టార్ బౌలర్ మహమ్మద్ సిరాజ్ తన పదునైన బౌలింగ్‌తో తొలి ఓవర్లలోనే సీఎస్‌కే కీలక వికెట్లు పడగొట్టి కోలుకోలేని దెబ్బ తీశాడు. కష్టాల్లో ఉన్న జట్టును ఆదుకోవడానికి శివమ్ దూబే తీవ్రంగా శ్రమించాడు. దూబే కేవలం 17 బంతుల్లో 47 పరుగులు చేసి ఒంటరి పోరాటం చేసినప్పటికీ, అతనికి అవతలి వైపు నుంచి తగిన మద్దతు లభించలేదు.

చెన్నై మిగతా బ్యాటర్లు ఒకరి తర్వాత ఒకరు చేతులెత్తేయడంతో, సీఎస్‌కే జట్టు కేవలం 13.4 ఓవర్లలోనే 140 పరుగులకే  కుప్పకూలిపోయింది. గుజరాత్ బౌలర్లలో మహమ్మద్ సిరాజ్, కగిసో రబాడ, రషీద్ ఖాన్ తలా మూడు వికెట్లతో చెలరేగి  చెన్నై పతనాన్ని శాసించారు.