బాత్రూమ్లో దూరిన మొసలి... బాబోయ్!
posted on Jul 30, 2014 6:05PM
గుజరాత్లోని ఆనంద్ నగరం సమీపంలోని సోజిత్రా అనే పట్టణంలో భరత్ పటేల్ అనే ఒకాయన నాలుగు రోజుల క్రితం ఉదయాన్నే నిద్రలేచి ఆవలిస్తూ తమ ఇంట్లో వున్న టాయిలెట్కి వెళ్ళాడు. టాయిలెట్ లోపలకి చూసిన ఆయన ఆవలిస్తూ తెరిచిన నోటిని తెరిచినట్టే వుంచేసి కళ్ళు కూడా పెద్దవి చేసుకుని బాత్రూమ్లోకి చూశాడు. తాను చూస్తున్నది కలా నిజమా అని డౌటొచ్చి కళ్ళు నులుముకున్నాడు, చేతి మీద గిల్లుకుని కెవ్వుమనబోయి అంతలోనే నోరు మూసేసుకున్నాడు. ఇంతలో ఆయన గారు బాత్రూమ్లో ఏం చూశాడంటే ఓ అయిదడుగుల మొసలిని చూశాడు. ఓ మొసలి భరత్ పటేల్ బాత్రూమ్లో సెటిలై రెస్టు తీసుకుంటోంది. మొసలినిచూసిన కొద్ది క్షణాల తర్వాత భరత్ పటేల్కి తన కర్తవ్యం గుర్తొచ్చింది. తాను బాత్రూమ్కి ‘వచ్చిన పని’ని కూడా మరచిపోయి కార్యాచరణలోకి దిగిపోయాడు. వెంటనే బాత్రూమ్ డోర్ మూసేసి అటవీశాఖ అధికారులకు సమాచారం అందించాడు. ఫారెస్టు అధికారులు ఓ బోనును పట్టుకొచ్చి సదరు మొసలిని పట్టుకుని తీసుకెళ్ళిపోయారు. ఇంత టౌన్ మధ్యలోకి, అది కూడా మా బాత్రూమ్లోకి మొసలి ఎలా వచ్చిందో చెప్పండి.. నాకు తెలియాలి అని భరత్ పటేల్ వేసిన ప్రశ్నలకు సమాధానాలు దొరకలేదు.