మంత్రి హోదాలో తొలి సారిగా విశాఖ పట్నం పర్యటనకు వచ్చిన నారా లోకేష్ కు అక్కడ ఘన స్వాగతం లభించింది. రాష్ట్ర మానవ వనరుల అభివృద్ధి, ఐటీ శాఖల మంత్రి నారా లోకేష్ బుధవారం (ఆగస్టు 28) రాత్రి విశాఖ చేరుకున్నారు. మంత్రిగా బాధ్యతలు చేపట్టిన తరువాత ఆయన తొలి సారిగా విశాఖపట్నం వచ్చారు. ఈ సందర్భంగా ఆయనకు విశాఖ విమానాశ్రయంలో పార్టీ నేతలు, కార్యకర్తలు ఘన స్వాగతం పలికారు.

 పార్టీ ఆంధ్రప్రదేశ్ అధ్యక్షుడు పల్లా శ్రీనివాసరావు, ఎంపీ  శ్రీభరత్‌, ఎమ్మెల్యేలు గంటా శ్రీనివాసరావు, వెలగపూడి రామకృష్ణబాబు, పి.గణబాబు, బండారు సత్యనారాయణమూర్తి, కేఎస్‌ఎన్‌ఎస్‌ రాజు, ఎమ్మెల్సీలు దువ్వారపు రామారావు, వేపాడ చిరంజీవిరావు, విశాఖపట్నం, అనకాపల్లి పార్లమెంటరీ నియోజకవర్గాల పార్టీ అధ్యక్షులు గండి బాబ్జీ, బత్తుల తాతయ్యబాబు, పార్టీ నాయకులు కిడారి శ్రావణ్‌కుమార్‌, బుద్ధా నాగజగదీష్‌, దాడి రత్నాకర్‌, ప్రగడ నాగేశ్వరరావు, సీతంరాజు సుధాకర్‌లు లోకేష్ కు స్వాగతం పలికిన వారిలో ఉన్నారు.    

ఎయిర్‌పోర్టు నుంచి నేరుగా లోకేశ్‌ సెవెన్‌హిల్స్‌ ఆస్పత్రి వెనుక ఉన్న జిల్లా పార్టీ కార్యాలయానికి చేరుకున్నారు. అక్కడ ఆయనకు  తెలుగు మహిళలు  హారతి ఇచ్చి స్వాగతం పలికారు. పార్టీ కార్యాలయం ఆవరణలో గల బస్సులో ఆయన రాత్రి బస చేశారు.