రాత్రిపూట హాయిగా పడుకుంటే(నిద్రపోతే) చనిపోతారనే వదంతులు వ్యాపించటంతో రాష్ట్రంలోని పలు జిల్లాల్లో జాగరం చేశారు. హైదరాబాద్‌, కర్నూలు, అనంతపురం, మహబూబ్‌ నగర్‌, నిజామాబాద్‌, మెదక్‌ తదితర జిల్లాలో బుధవారం అర్ధరాత్రి ఈ వదంతులు వ్యాపించాయి. ఈ వదంతులను నమ్మిన కొందరు తమ సన్నిహితులకు, స్నేహితులకు ఎస్‌ఎంఎస్‌ చేశారు. దీంతో అప్పటి దాకా కునుకు తీస్తున్న వారు కూడా లేచి కూర్చున్నారు. తమతో పాటు కుటుంబ సభ్యులను నిద్రలేపి కాలక్షేపం చేశారు. ప్రత్యేకించి అర్ధరాత్రి నుంచి ఈ జిల్లాల్లోని ఇళ్లలో దీపాలు వెలగటం, రాత్రంతా టీవీలతో కాలక్షేపం చేయటం గమనార్హం. కుటుంబసభ్యు లందరూ దాదాపు శివరాత్రి పర్వదినంలా జాగరం చేశారు. పక్కఇళ్లలో వారిని కూడా లేపి కొందరు కబుర్లతో కాలక్షేపం చేశారు. మరికొందరు మేడలపైన మూడుముక్కలాటతో గడిపేశారు. కొన్ని ప్రాంతాల్లో క్యారంబోర్డు టోర్నీలు నడిచాయి. అర్ధరాత్రి వ్యాపించిన వదంతులను ఎంత వేగంగా నమ్మారంటే దాదాపు పగలు కన్నా రాత్రి ఎక్కువ మంది షికార్లు చేస్తూ కనిపించారు. చిన్నారులను కూడా నిద్రపోనీయకుండా ఆడించారంటే ఈ వదంతులను ఎంతలా నమ్మారో ఇట్టే అర్థమైపోతోంది. ఇదంతా వట్టి ట్రాష్‌ అని, రాత్రంతా ఎవరో కావాలని వదంతులు సృష్టించారని గురువారం ఉదయం ఈ జిల్లాల్లో వారు గుర్తించారు.