ఘాట్కేసర్‌లో అర్థరాత్రి వేళ చోటుచేసుకున్న ఘటన స్థానికులను కలవరానికి గురిచేసింది. రోడ్డుపై వెళ్తున్న వాహనాలనే లక్ష్యంగా చేసుకుని కొందరు యువకులు బీభత్సం సృష్టించారు. బైక్‌లపై దూసుకొచ్చిన వారు కార్లను వెంబడిస్తూ, ప్రమాదకరంగా డ్రైవింగ్ చేస్తూ వాహనదారులను భయభ్రాంతులకు గురిచేశారు. కొంతదూరం వరకు వెంటాడుతూ దాడికి కూడా యత్నించినట్లు సమాచారం.

ఈ ఘటనకు సంబంధించిన దృశ్యాలు ఓ కారు డ్యాష్‌క్యామ్‌లో రికార్డు కావడంతో విషయం వెలుగులోకి వచ్చింది. వీడియోలో బైక్‌లపై వచ్చిన యువకులు కారు చుట్టూ తిరుగుతూ, దానిని అడ్డుకునేందుకు ప్రయత్నించినట్లు స్పష్టంగా కనిపిస్తోంది. కారులో మహిళలు, చిన్నారులు ఉన్నారని తెలిసినా వెనక్కి తగ్గకుండా మరింత దూకుడుగా వ్యవహరిస్తూ హంగామా సృష్టించినట్లు బాధితులు తెలిపారు.

పోకిరీల తీరుతో కారులో ఉన్న చిన్నారులు భయంతో బిగ్గరగా ఏడవగా, మహిళలు తీవ్ర ఆందోళనకు గురయ్యారు. పరిస్థితి విషమించడంతో డ్రైవర్ అప్రమత్తంగా వ్యవహరించి అక్కడి నుంచి సురక్షితంగా బయటపడినట్లు తెలుస్తోంది.

ఈ భయానక అనుభవాన్ని వివరిస్తూ ఓ యువతి సోషల్ మీడియాలో వీడియోను పోస్టు చేసింది. రాత్రి వేళల్లో ప్రజల భద్రత ప్రశ్నార్థకంగా మారుతోందని ఆవేదన వ్యక్తం చేస్తూ, డ్యాష్‌క్యామ్ దృశ్యాల ఆధారంగా నిందితులను గుర్తించి కఠిన చర్యలు తీసుకోవాలని పోలీసులను కోరింది.

ప్రస్తుతం ఈ వీడియో సోషల్ మీడియాలో వైరల్‌గా మారి చక్కర్లు కొడుతోంది. రాత్రి వేళల్లో ఇలాంటి పోకిరీల ఆగడాలకు అడ్డుకట్ట వేయాలని నెటిజన్లు కూడా డిమాండ్ చేస్తున్నారు. ఈ ఘటనపై పోలీసులు స్పందించి విచారణ చేపడతారా? బాధ్యులను గుర్తించి చట్టం ముందు నిలబెడతారా? అన్నది ఇప్పుడు ఆసక్తికరంగా మారింది.