సింగర్ గీతామాధురి, నటుడు నందు లు గతకొద్ది కాలంగా ప్రేమలో మునిగి తేలుతున్న విషయం అందరికి తెలిసిందే. అయితే వీరి వివాహ నిశ్చితార్థం సోమవారం హైదరాబాద్ లో జరిగింది. వచ్చే సంవత్సరం ఫిబ్రవరి 9న వివాహం జరిపేందుకు ఇరు కుటుంబ సభ్యులు నిశ్చయించారు. ఈ సందర్భంగా గీత మాట్లాడుతూ... "నేను, నందు ఎప్పట్నుంచో మంచి స్నేహితులం. ఆ స్నేహం ప్రేమగా మారింది. ఏడాది క్రితమే పెళ్లి చేసుకోవాలని అనుకున్నాం. అయితే కొన్ని అనివార్య కారణాల వల్ల జరగలేదు. ఇపుడు ఇరు కుటుంబ సభ్యులు అంగీకరించి, ఇలా సందడిగా మా నిశ్చితార్థం జరిగింది. మాఘమాసంలో మేం పెళ్లి చేసుకోబోతున్నాం" అని అన్నారు. గీత ప్రస్తుతం తెలుగులో పలు చిత్రాల్లో పాటలు పడుతూ చాలా బిజీగా ఉంది. అదే విధంగా నందు కూడా పలు సినిమాలు చేస్తూ, నటుడిగా మంచి పేరు తెచ్చుకుంటున్నాడు.