తెలుగుదేశం పార్టీ జాతీయ అధ్యక్షుడు, మాజీ సీఎం చంద్రబాబు నాయుడు పార్టీ నేతలతో వరుస సమావేశాలు, సదస్సులతో బిజీబిజీగా ఉంటున్నారు. టీడీపీ నేతల్లో మరింత చైతన్యం నింపేందుకు కార్యాచరణతో ముందుకు పోతున్నారు. వైసీపీ అరాచక పాలనపై, చేతగానితనంపై ఎక్కడిక్కడ పార్టీ నేతలు, శ్రేణులు ఎలా స్పందించాలో దిశా నిర్దేశం చేస్తున్నారు. వారికి అవగాహన కల్పింస్తున్నారు.ఆ క్రమంలో మంగళగిరిలోని టీడీపీ ప్రధాన కార్యాలయంలో పార్టీ మద్దతుతో గెలిచిన సర్పంచ్ లకు చంద్రబాబు నాయుడు గురువారం అవగాహన సదస్సు నిర్వహించారు. శుక్రవారం విశాఖపట్నం, విజయనగరం, తూర్పుగోదావరి జిల్లాల పార్టీ ఎమ్మెల్యేలు, నియోజకవర్గం ఇన్ చార్జిలతో భేటీ ఏర్పాటు చేశారు. ఈ సమావేశానికి రావాలని ఇన్ చార్జిలు, ఎమ్మెల్యేలకు అధిష్టానం నుంచి పిలుపు వచ్చింది. అలా విశాఖ నార్త్ అసెంబ్లీ నియోజకవర్గం నుంచి గెలిచిన గంటా శ్రీనివాసరావు కూడా పార్టీ కార్యాలయం నుంచి పిలుపు అందింది.

అయితే.. ముందుగానే ఫిక్స్ చేసుకున్న కార్యక్రమాల్లో తాను పాల్గొనాల్సి ఉన్న కారణంగా పార్టీ అధినేత చంద్రబాబుతో సమావేశానికి హాజరు కాలేనని, త్వరలోనే వచ్చి బాస్ ను కలుస్తానంటూ పార్టీ కార్యాలయానికి గంటా సమాచారం పంపించారు. టీడీపీ అధినేత సమావేశానికి హాజరు కాకుండా గంటా శ్రీనివాసరావు డుమ్మా కొట్టడంపై రాజకీయ వర్గాల్లో ఇప్పుడు చర్చ నడుస్తోంది. నిజానికి.. 2019 ఎన్నికల్లో గెలిచిన తర్వాత నుంచీ ఎమ్మెల్యే గంటా శ్రీనివాసరావు క్రియాశీలంగా ఉండడం లేదు. టీడీపీకి కూడా దూరంగా ఉంటున్నారు. కాకపోతే కొద్ది కాలంగా ఆయన మళ్లీ పార్టీ కార్యక్రమాల్లో పాల్గొంటున్నట్లు టీడీపీ నేతలు చెబుతుండడం గమనార్హం.

అయితే.. గంటా శ్రీనివాసరావు టీడీపీ అధికారంలో ఉన్నప్పుడు మంత్రి పదవి అనుభవించి, ఇప్పుడిలా క్రియాశీలంగా ఉండకపోవడానికి కారణం.. ఆయన వైసీపీ వైపు మొగ్గు చూపుతున్నారనే పుకార్లు ఉన్నాయి. ఇప్పటికే వైసీపీ అధ్యక్షుడు జగన్ రెడ్డితో మంతనాలు జరుపుకున్నారని, తమ పార్టీలో గంటాను చేర్చుకునేందుకు జగన్ ఓకే చెప్పారనే ప్రచారం కూడా గతంలోనే జరిగింది. విశాఖ ఉక్కు ఫ్యాక్టరీని ప్రైవేటీకరించాలనే కేంద్రం నిర్ణయానికి నిరసనగా గంటా శ్రీనివాసరావు తన ఎమ్మెల్యే పదవికి రాజీనామా చేశారు. రాజీనామా చేసినప్పటికీ దాన్ని స్పీకర్ ఆమోదించడానికి ఓ మెలిక కూడా పట్టడం విశేషం. విశాఖ స్టీల్ ప్లాంట్ ప్రైవేటైజేషన్ కు సంబంధించి కేంద్రం నిర్ణం అమలులోకి వచ్చిన వెంటనే తన రాజీనామాను ఆమోదించాలని స్పీకర్ ను గంటా కోరడం ఆశ్చర్యం కలిగించక మానదు. ఇప్పటికి ఇంకా గంటా శ్రీనివాసరావు రాజీనామా లేఖ స్పీకర్ వద్ద పెండింగ్ లోనే ఉంది.

మరో పక్కన గంటా శ్రీనివాసరావు తన సామాజివర్గం నేతల సమావేశాల్లో పాల్గొంటూనే ఉన్నారు. ఇంకో పక్కన టీడీపీ కార్యక్రమాలకు దూరంగా ఉంటున్నారు. ఈ విధమైన వ్యవహార సరళితో గంటా శ్రీనివాసరావు ఎత్తుగడ ఏమిటి? టీడీపీలోనే ఉంటారా? లేక వైసీపీ తీర్థం తీసుకునేందుకే మొగ్గు చూపుతున్నారా? అనే చర్చ రాజకీయ వర్గాల్లో నడుస్తోంది. లేదంటే ఎటూ తేల్చుకోలేని అయోమయంలో గంటా పడిపోయారా? అనే అనుమానాలు కూడా రాజకీయ విశ్లేషకుల నుంచి వ్యక్తం అవుతున్నాయి.