కోల్లేరు... దక్షిణ ప్రాంతంలో ఒకనాడు అది అతిపెద్ద మంచినీటి సరస్సు. రూపాయినాణెం నీటిలో వేస్తే పది అడుగుల లోతులో అదిపడినా స్పష్టంగా కనిపించేది. కొల్లేటి సరస్సు నీరు అంత స్పష్టంగా అంత స్వచ్ఛంగా ఉండేది. పలురకాల మత్స్య సంపద ఇక్కడ పుష్కలంగా ఉండేది ఈ విషయాన్ని విదేశీ పక్షులు కూడా గమనించి ప్రతి సంవత్సరం ఇక్కడకు వలసలు వచ్చి హాయిగా జీవించేవి. కొల్లేటి లంక మత్స్యకారులు కూడా చేపలు వేటాడుతూ సుఖంగా జీవించేవారు. ఇప్పుడు ఈ కొల్లేరు లంక గ్రామాల్లోని మత్స్యకారులు ఉపాధి లేక ఇతర ప్రాంతాలకు వలసలుపోతున్నారు. 50 సంవత్సరాల ఈ చరిత్రలో కొల్లేరు ప్రాంతం నుంచి మత్స్యకారులు వలసలుపోవడం ఇదే మొదటిసారి. సుమారు 50 ఏళ్ళక్రితం ఒరిస్సా నుంచి వలస వచ్చిన కూలీలు కొల్లేరులో స్థిరనివాసం ఏర్పరచుకున్నారు. ఇప్పుడు ఉపాధిలేక వారు మళ్ళీ ఇతరప్రాంతాలకు వలసపోతున్నారు. దీంతో కొన్ని లంకగ్రామాలు నిర్మానుష్యంగా మారాయి.