యంగ్ రెబెల్ స్టార్ ప్రభాస్ హీరోగా నటించిన ‘మిర్చి’ సినిమా నిర్మాతలకు, బయ్యర్లకు కాసుల వర్షం కురిపిస్తుండగా, అమెరికాలో మిర్చిని విడుదలచేసిన గ్రేట్ ఇండియా ఫిలిమ్స్ సంస్థకు కూడా ఊహించని లాభాలు ఆర్జించిపెడుతోంది. అక్కడి తెలుగువారికి ‘మిర్చి’ఘాటు నచ్చడంతో, ఇటీవలే అక్కడా కూడా 50 రోజులు పూర్తిచేసుకొంది కూడా. అమెరికాలో 50 రోజులు ఆడిన మొట్టమొదటి తెలుగు సినిమాగా మిర్చి సరికొత్త రికార్డు స్వంతం చేసుకొంది. న్యు జెర్సీనగరంలో రీగల్ కామర్స్ సెంటర్ మరియు కారీ అనే ప్రాంతంలో కార్మేక్ పార్క్ వద్దగల రెండు సినిమా దియేటర్లలో మిర్చి 50 రోజులు పూర్తి చేసుకొంది. అంతే కాకుండా, రీగల్ కామర్స్ సెంటర్ వద్ద మిర్చి కలెక్షన్లు హాలివుడ్ సినిమా కలెక్షన్ల కంటే కూడా బాగున్నాయని గ్రేట్ ఇండియా ఫిలిమ్స్ సంస్థ యాజమాన్యం తెలియజేసింది. ఇటువంటి అవకాశం కల్పించిన నిర్మాతలకు, సినిమాను ఇంత బాగా మలిచిన దర్శకుడు కొరటాల శివకు, హీరో ప్రభాస్, హీరోయిన్లు అనుష్క, రిచాలకు ఆ సంస్థ యాజమాన్యం కృతజ్ఞతలు తెల్పింది.