హైదరాబాద్ నగరంలో సంచలనం సృష్టించిన నకిలీ నోట్ల కేసులో ప్రధాన నిందితుడు ఎల్లంగౌడ్ అరెస్టయ్యాడు. ఎల్లంగౌడ్‌ని ఎస్ఓటీ పోలీసులు మహారాష్ట్రలో అరెస్టు చేశారు. ఈ నెల నాలుగో తేదీన హైదరాబాద్ శివార్లలోని శామీర్పేట ప్రాంతంలో ఎల్లంగౌడ్ను అరెస్టు చేసేందుకు పోలీసులు ప్రయత్నించారు. అప్పుడు ఎల్లంగౌడ్ పోలీసుల మీద జరిపిన కాల్పుల్లో ఒక పోలీస్ కానిస్టేబుల్ మరణించాడు. పోలీసులు జరిపిన ఎదురు కాల్పుల్లో ఎల్లంగౌడ్ అనుచరుడు మరణించాడు. అప్పటి నుంచి ఎల్లం గౌడ్ కోసం తీవ్రంగా గాలిస్తున్న పోలీసులు ఎట్టకేలకు అతణ్ణి మహారాష్ట్రలో అరెస్టు చేశారు. ఎల్లంగౌడ్ తరచు తన భార్యకు ఫోన్ చేస్తుండటంతో ఆమె కాల్ డేటా ఆధారంగా అతడున్న ప్రాంతం వివరాలు సేకరించి అరెస్టు చేసి హైదరాబాద్కు తరలించారు.