సినీ హీరో ఇంట్లో బాంబు బూచీ

ప్రముఖ తమిళ కథానాయకుడు అజిత్ ఇంటికి శనివారం ఉదయం బాంబు బెదిరింపు కాల్ వచ్చింది. శనివారం తెల్లవారుఝామున ఒక వ్యక్తి అజిత్ ఇంటికి ఫోన్ చేసి, ‘మీ ఇంట్లో బాంబు పెట్టాం. అది పేలబోతోంది’ అని చెప్పి ఫోన్ పెట్టేశాడు. దాంతో అజిత్ ఫిర్యాదు మేరకు బాంబుస్క్వాడ్ ఆయన ఇంటికి హుటాహుటిన చేరుకుని అణువణువూ గాలించింది. అయితే, ఎలాంటి బాంబు లేకపోవడంతో అది ఉత్తుత్తి కాల్ మాత్రమేనని తేలింది. ఈ బాంబు బెదిరింపు కాల్ చేసిందెవరో కనుగొనే ప్రయత్నంలో ప్రస్తుతం పోలీసులు వున్నారు. చెన్నైలో ఇప్పుడు ఉత్తుత్తి బాంబు బెదిరింపు కాల్స్ సీజన్ నడుస్తున్నట్టు వుంది. శనివారం నాడే చెన్నై విమానాశ్రయానికి ఒక ఆకతాయి ఫోన్ చేసి బాంబు వుందని చెప్పాడు. బాంబు స్క్వాడ్ తనిఖీల తర్వాత అది ఫేక్ కాల్‌గా పోలీసులు తేల్చారు. ఫోన్ చేసిన ఆకతాయిని అరెస్టు చేశారు. చెన్నై విమానాశ్రయానికి, అజిత్ ఇంటికి ఫోన్ చేసింది ఒకరేనా కాదా అనేది తేలాల్సి వుంది.