తరుచుగా కరువు ప్రాంతాల్లోనే గుప్తనిధుల వేట సాగుతోంది.  ఈ ప్రాంతాల్లో పని దొరకక ఖాళీగా ఉండే వారిని కొందరు వ్యాపారులు గుర్తించి వారిని గుప్తనిధుల తవ్వకాలకు వినియోగిస్తున్నారని సమాచారం. దీంతో వారు తమకు పని, ఆదాయం లభిస్తోందని ఇతర రాష్ట్రాల నుంచి వచ్చే వ్యాపారులు ఏమి చెబితే దాన్ని యథాతథంగా అమలు చేస్తున్నారు. కొన్నేసార్లు పొరబాట్లు జరిగితే వాటిని భరించటానికి కూడా వెనుకాడటం లేదు. దీంతో గుప్తనిధుల వేట మూడుపువ్వులూ, ఆరుకాయలూలా విస్తరిస్తోందని తేలుస్తోంది. ప్రత్యేకించి ఈ పరిస్థితిని అథ్యయనం చేసిన పోలీసు అధికారులు కూడా ఆశ్చర్యపోయే అంశాలు తాజాగా వెలుగులోకి వచ్చాయి. కర్నూలు, కడప, చిత్తూరు తదితర రాయలసీమ జిల్లాల్లో ఇప్పటివరకూ ఈ గుప్తనిధుల తవ్వకాలు బారీస్థాయిలో జరిగాయి. కొత్తగా ఇప్పుడు తెలంగాణా జిల్లాల్లో తవ్వకాలు జరుగుతున్నాయి.రంగారెడ్డి జిల్లా తక్కళ్లపల్లి గ్రామంలోని సాగర్‌ రహదారి దగ్గర గుప్తనిధుల తవ్వకాలు జరిగాయి. రాక్షసగుహలు ఇక్కడ ఉన్నాయని చెప్పుకుంటారు. అందువల్ల భారీగా లాభం వస్తుందని తవ్వకాలు జరిపేవారు ఆశపడుతుంటారు. ఈ తవ్వకాలకు జెసిబి వినియోగించారంటే తవ్వకందార్లు ఎంత తెలివిమీరారో ప్రత్యేకంగా చెప్పాల్సిన పని లేదు. ఎనిమిది అడుగుల లోతున తవ్వకాలు జరిగిన అధికార యంత్రాంగం మాత్రం స్పందించలేదు. ఆమ్యామ్యాలు అందుకున్నందునే అథికారులు స్పందించలేదని ఆరోపణలు వచ్చాయి. అయితే తవ్వకందార్లు లాభపడ్డారని మాత్రం తెలుస్తోంది. ఇప్పటిదాకా జరిగిన తవ్వకాలను బట్టి అన్ని ప్రాంతాలు కరువుకోరల్లో ఉన్నవే కావటం గమనార్హం.