రాష్ట్రం అవలంబించిన కొత్త పాలసీతో బెల్టుషాపులకు చెక్‌ పెట్టేద్దామనుకున్న ప్రభుత్వానికి మరో తరహాలో ఈ సమస్య ఎదురవుతుంది. పగలంతా ఎక్సైజ్‌ పోలీసుల పహారాతో గప్‌చుప్‌గా ఉన్నా చీకటి పడేసరికి అక్రమమార్గాల్లో తెరచి అమ్మకం సాగిస్తున్నారు. దీనికోసం మద్యం వ్యాపారులు కొత్త చిట్కాలను కనిపెట్టారు. పిజ్జాలను డోర్‌ డెలివరీ చేస్తున్నట్లు మద్యాన్ని కూడా డోర్‌ డెలివరీ చేస్తున్నారు. సోడా బడ్డీలు , కిళ్లీ దుకాణాల్లో కూడా మద్యం విక్రయిస్తున్నారు. బడ్డీలు నిర్వహించలేనివారు సైకిళ్ళపై వీధివీధినా తిరుగుతూ చీప్‌ లిక్కర్‌ విక్రయిస్తున్నారు. ఈ పద్దతిలో రాష్ట్రంలో కొన్ని చోట్ల ఎక్సైజ్‌ అధికారులు ఇలాంటివారిని పట్టుకొని కేసు రిజస్టర్‌ చేశారు.అయితే ఇలాంటి అమ్మకాలు రాత్రిపూట ఎక్కువ జరుగుతున్నందువల్ల కేసులు నమోదు తక్కువగా ఉంది. ఎంఆర్‌పి రేట్లకే అమ్మకాలు చేస్తుండడం వల్ల షాపు ఓనర్లకు ఇప్పుడున్న పరిస్థితుల్లో లాభాలు బాగా తగ్గాయి. లూజు అమ్మకూడదన్నందుకు కూడా ఇలాంటి పనులు చేస్తున్నట్లు తెలుస్తుంది.మొత్తానికి మందుబాబులుకు మందు, షాపులవారికి లాభాలుగా వుండటానికి ఈ మార్గం కనిపెట్టారని తెలుస్తుంది.