ప్రపంచవ్యాప్తంగా తక్కువ ధరలో అత్యంత ప్రాణరక్షకమైన ఔషధాలను అందిస్తున్న  భారత ఫార్మా రంగానికి అగ్రరాజ్యాధినేత డోనాల్డ్ ట్రంప్  షాక్ ఇచ్చారు. విదేశాల నుంచి అమెరికాకు దిగుమతి అయ్యే జనరిక్ ఔషధాలపై   200 శాతం టారిఫ్‌లు విధించనున్నట్లు  ప్రకటించారు. అమెరికాలోనే స్వదేశీ ఔషధ తయారీని  ప్రోత్సహించి, స్థానిక ప్లాంట్ల ఏర్పాటును పెంచడమే లక్ష్యంగా ఈ సంచలన నిర్ణయం తీసుకున్నట్లు ట్రంప్ చెబుతున్నారు. ఈ ప్రకటనతో అమెరికా మార్కెట్‌పై   ఆధారపడిన ఇండియన్ ఫార్మా కంపెనీలు,  ఎగుమతిదారులపై ప్రభావం పడుతుందనడంలో సందేహం లేదు. 

 డోనాల్డ్ ట్రంప్ తన సోషల్ మీడియా ప్లాట్‌ఫామ్  ట్రూత్ సోషల్ వేదికగా చేసిన ఈ ప్రకటన మేరకు  వచ్చే నెల   1 నుండి   రెండేళ్ల పాటు అమెరికాలోకి దిగుమతి అయ్యే అన్ని రకాల జనరిక్ ఔషధాలపై సుంకం సున్నా శాతంగానే కొనసాగుతుంది. అయితే ఈ రెండేళ్ల వ్యవధి ముగిసిన వెంటనే, మొదటి ఏడాదిలోనే దిగుమతి సుంకాలను 100 శాతానికి పెంచుతారు. ఆ తర్వాత వచ్చే ఏడాదికి ఈ సుంకాన్ని  200 శాతానికి పెంచుతామని ట్రంప్ హెచ్చరించారు. ఈ నిర్దేశిత కాల వ్యవధిలో  అమెరికాలో తయారీ ప్లాంట్లు,  ఏర్పాటు చేయని విదేశీ ఔషధ కంపెనీలకు ఇది శిక్షగా మారుతుందని  ట్రంప్  హెచ్చరించారు.  

ప్రపంచ ఔషధ విపణిలో భారత్  కీలక పాత్ర పోషిస్తోంది. ముఖ్యంగా అమెరికా మార్కెట్‌లో విక్రయించే మొత్తం జనరిక్ మందులలో   40 శాతం   భారత్‌లోనే తయారవుతున్నాయి. గ్లోబల్ ట్రేడ్ రీసెర్చ్ ఇనిషియేటివ్ (జీఆర్టీఏ)  గణాంకాల ప్రకారం, 2024-25 ఆర్థిక సంవత్సరంలో ఇండియా ప్రపంచవ్యాప్తంగా మొత్తం 25.8 బిలియన్ డాలర్ల విలువైన ఫార్మా ఉత్పత్తులను ఎగుమతి చేయగా..  అందులో ఏకంగా 9.7 బిలియన్ డాలర్లు అంటే దాదాపు 38 శాతం  అమెరికాకే ఎగుమతి అయ్యాయి.  హైపర్‌టెన్షన్ ,  డయాబెటిస్ , క్యాన్సర్,  డిప్రెషన్ వంటి   వ్యాధులకు అమెరికన్లు వాడే అత్యవసర జనరిక్ మందులలో భారతీయ కంపెనీల వాటాయే ఎక్కువ. ఇక ఫైనాన్షియల్ పోస్ట్ నివేదిక మేరకు  2024లో అమెరికాలో ఉపయోగించిన మొత్తం గర్భనిరోధక మాత్రలలో దాదాపు 65 శాతం గ్లెన్‌మార్క్, లుపిన్ అనే రెండు   భారతీయ ఫార్మా కంపెనీల నుంచి ఉత్పత్తి అయినవే.

అయితే.. 2026 ఫిబ్రవరి నెలలో భారత్, అమెరికా మధ్య కుదిరిన ద్వైపాక్షిక వాణిజ్య ఒప్పందంలో జనరిక్ ఔషధాలు, వాటి ముడిసరుకుల సరఫరాపై పరస్పర చర్చల ద్వారానే నిర్ణయాలు తీసుకుంటామని పేర్కొన్నారు. ఈ నేపథ్యంలో ట్రంప్ ప్రకటించిన ఈ   నిర్ణయం అమలైతే భారత ఫార్మా పరిశ్రమపైనే కాకుండా..  అమెరికాలోని సామాన్యులపై   కూడా తీవ్ర భారం పడుతుంది.  

Donald Trump pharma tariffs, Indian generic medicines America, US import duties on generics, Indian pharma industry, GTRI pharma export report