కొద్ది రోజుల క్రితం నాగపూర్‌లోని ఒక ఆస్పత్రిలో మధ్యప్రదేశ్‌ రాష్ట్రానికి చెందిన కాంతాబాయ్ అనే 60 ఏళ్ళ మహిళ కడుపులో వైద్యులు ఒక అస్థిపంజరాన్ని గుర్తించారు. కడుపు నొప్పిగా వుందంటూ ఆస్పత్రికి వచ్చిన ఆమె కడుపును స్కాన్ చేసిన డాక్టర్లు లోపల చిన్న అస్థిపంజరం వుండటం గమనించి షాకయ్యారు. ఆ అస్థిపంజరం ఆమె కడుపులో 36 సంవత్సరాలుగా వుందని గ్రహించారు. 24 ఏళ్ళ వయసులో గర్భందాల్చిన ఆమెకు గర్భాశయం వెలుపల పిండం ఎదగడంతో అబార్షన్ జరిగింది. అయితే పిండం అవశేషాలను బయటకి తీయించుకోవడానికి భయపడింది. ఆ తర్వాత అంతా సర్దుకున్నట్టు అనిపించడంతో ఊరుకుంది. ఇన్నేళ్ళ తర్వాత కడుపులో నొప్పిగా వుందని ఆస్పత్రికి వచ్చి పరీక్షలు చేయించుకుంటే అసలు విషయం బయటపడింది. ఆమె కడుపులోనే వుండిపోయిన పిండం కాలక్రమేణంగా నశించిపోయి చివరకు అస్థిపంజరంగా మిగిలింది. ఆమెకు ఆపరేషన్ చేసి అస్థిపంజరాన్ని బయటకి తీశారు. తాజాగా ఆ అస్థిపంజరం ఫొటోని మీడియాకి విడుదల చేశారు.