హైదరాబాద్: అధికార కాంగ్రెస్‌లో అనైక్యత కనిపిస్తోంది. సమస్య ఎదురైనపుడు ఎవరి దారి వారిదేనన్న విషయం శాసనసభ సమావేశాల్లో బహిర్గతమవుతోంది. ప్రతిపక్షాల నుంచి ఎదురయ్యే దాడిని మంత్రులు, అధికార పార్టీ సభ్యులు ఉమ్మడిగా ఎదుర్కోవలసి ఉండగా, చాలామంది తమకు పట్టనట్టు వ్యవహరిస్తున్నారు. కీలకమైన అంశాలపై సభలో చర్చ జరుగుతున్న సమయంలోనూ పలువురు మంత్రులు, అధికార పార్టీ ఎమ్మెల్యేలు లాబీల్లోనే తిరుగుతున్నారు. మంత్రులు, కాంగ్రెస్ ఎమ్మెల్యేలు సభలో ఉండేటట్టు చూడాలని ముఖ్యమంత్రి ఆదేశించడంతో ప్రభుత్వ చీఫ్ విప్, విప్‌లు నానా అవస్థలు పడుతున్నారు.  సభలో పట్టుమని పాతికమంది ఎమ్మెల్యేలు కూడా ఉండటం లేదు. ప్రభుత్వం మీద ప్రతిపక్షాలు విమర్శలు, ఆరోపణలు చేసినపుడు ఒకరిద్దరు మంత్రులు వినా మిగిలిన మంత్రులు, పార్టీ  ఎమ్మెల్యేలు పెద్దగా స్పందించటం లేదు. ముఖ్యమంత్రే చూసుకుంటారులే అన్న ధోరణితో వారున్నారు. ప్రతిపక్షాలు  వ్యక్తిగతంగా తమ మీద విమర్శలు చేస్తే మాత్రం మంత్రులు ఎదురుదాడికి దిగుతున్నారు. సీనియర్ ఎమ్మెల్యేలు సైతం సభ పట్ల  ఆసక్తి చూపించడం లేదు.

ప్రతిపక్ష నేత చంద్రబాబుపై అధికారపక్ష సభ్యులు విమర్శలు చేసినపుడు ఆయనకు మద్దతుగా టిడిపి  సభ్యులంతా లేచి నిలబడటం, పదేపదే పోడియం వద్దకు దూసుకుపోవడం వంటివి చేస్తున్నారు. అదే ప్రతిపక్షాలు రాష్ట్ర ప్రభుత్వం మీదగాని, ముఖ్యమంత్రి మీదగాని విమర్శలు చేసినపుడు అధికార పక్ష సభ్యులు ఉత్సాహంగా లేచి నిలబడటానికి, ప్రతిపక్షంపై ఉమ్మడిగా ఎదురుదాడి చేయడానికి ఏమాత్రం ఉత్సాహం చూపటం లేదు. ప్రభుత్వం మీద ప్రతిపక్షాలు చేసే విమర్శలను ఎదుర్కోవడంలో మంత్రులు కూడా సమష్టి బాధ్యత తీసుకోకపోవడం ఆశ్చర్యం  కలిగిస్తోందని కాంగ్రెస్ ఎమ్మెల్యేలు కొందరు అంటున్నారు. ‘మనమీదకి వస్తే చూసుకుందాం. లేనిపోని గొడవలు  మనకెందుకు’ అన్న ధోరణి మంత్రుల్లో వ్యక్తమవుతోంది. గతంలో వైఎస్ ముఖ్యమంత్రిగా ఉన్నపుడు ఆయన సభలో ఉంటే  ఎమ్మెల్యేలు తమ సీట్లోంచి కదలడానికే భయపడే వారు. ఏదైనా అత్యవసర పరిస్థితి వచ్చి బయటికి రావాల్సి వస్తే కొందరైతే  వైఎస్సేకి చెప్పి బయటికి వెళ్ళేవారు. సభలో సక్రమంగా కూర్చోని సభ్యుల్ని వైఎస్ స్వయంగా పిలిచి మందలించే వారు. పైగా సభ ప్రారంభ సమయానికి సభ్యులందరూ వచ్చి తమస్థానాల్లో కూర్చునే వారు.


ప్రస్తుతం ముఖ్యమంత్రి కిరణ్‌కుమార్‌రెడ్డి మంత్రివర్గంలో నలభైమందికి పైగా మంత్రులున్నారు. శాసనసభ సమావేశాలు ఉదయం తొమ్మిది గంటలకు ప్రారంభం అవుతుండగా శాసనమండలి సమావేశాలు పది గంటలకు ప్రారంభం అవుతాయి. మంత్రులు రెండు సభలకు వెళ్ళాల్సి ఉంటుంది. అందువల్ల మంత్రులను ఎ, బి గ్రూపులుగా విడదీసి ఒకరోజు ఒక గ్రూపు మండలిలో, మరో గ్రూపు శాసనసభలో ఉండేట్టు కార్యక్రమాన్ని రూపొందించారు. అంటే ఉభయ సభలు జరుగుతున్న సమయంలో సగంమంది మంత్రులు శాసనసభలో, సగంమంది మంత్రులు శాసనమండలిలో ఉంటారు. అయితే ఇరవై మందికి పైగా మంత్రులు శాసనమండలికి హాజరు కావలసి ఉండగా శుక్రవారం ఒక సమయంలో కనీసం ఒక్క మంత్రి కూడా సభలో లేకపోవడాన్ని ప్రతిపక్షాలు ఆక్షేపించాయి. దీంతో మంత్రులు లేక సభను పది నిముషాలు చైర్మన్ వాయిదా వేయాల్సిన పరిస్థితి తలెత్తింది. చట్ట సభల పట్ల మంత్రులు ఎంత బాధ్యగా వ్యవహరిస్తున్నారన్న దానికి ఈ సంఘటనే నిదర్శనం.