TeluguOne Health
● # Tweets

Download the TeluguOne App

Choose your platform to continue

11 కాదు, 30మందికిపైగా మృతి.. రుయా ఘ‌ట‌న‌పై ఫిర్యాదు.. జ‌గ‌న్ స‌ర్కారుకు షాక్‌..

Published on: Tue May 18, 2021 4:26PM

తిరుప‌తి రుయా ఘ‌ట‌న‌ జాతీయ మానవ హ‌క్కుల సంఘానికి చేరింది.  రుయాలో ఆక్సిజ‌న్ కొర‌త‌తో 11మంది క‌రోనా బాధితులు మృతి చెందార‌ని ఎన్‌హెచ్ఆర్‌సీకి ఫిర్యాదు అందింది. అయితే, ప్ర‌భుత్వం 11 మందే అని చెబుతున్నా.. రుయా ఘ‌ట‌న‌లో ఆక్సిజ‌న్ కొర‌త‌తో 30 మందికి పైగా మృతి చెందార‌ని తిరుప‌తి మాజీ ఎంపీ చింతా మోహ‌న్ ఫిర్యాదు చేశారు. ఈ ఫిర్యాదు నిజ‌మైతే తీవ్ర మాన‌వ హ‌క్కుల ఉల్లంఘ‌న అవుతుంద‌ని ఎన్‌హెచ్ఆర్‌సీ వ్యాఖ్యానించింది. ఘ‌ట‌న‌పై నాలుగు వారాల్లో నివేదిక ఇవ్వాల‌ని ఏపీ ఆరోగ్య శాఖ‌ను ఆదేశించింది.  

మ‌రోవైపు.. ఇప్ప‌టికే తిరుపతి రుయా ఆసుపత్రి ఘటనపై హైకోర్టులో ప్రజాప్రయోజన వ్యాజ్యం దాఖలైంది. ఆక్సిజన్ అందక రుయా ఆసుపత్రిలో చనిపోయిన కొవిడ్ బాధితులకు ప్రభుత్వం కోటి రూపాయల నష్ట పరిహారం అందించాలని పిటిషన్‌లో కోరారు. రుయా ఆసుపత్రి ఘటనపై జ్యూడిషియ‌ల్ విచారణ జరిపించాలని పిల్‌లో తెలిపారు. రుయా ఆస్పత్రిపై ఎఫ్‌ఐఆర్ నమోదు చేయాలని పిటిషన్‌లో పేర్కొన్నారు. రాష్ట్రంలో 5 ఆక్సిజన్ ప్లాంట్స్ వెంటనే నెలకొల్పాలని, కొవిడ్ బాధితులకు మందులు, ఆక్సిజన్ అవసరమైన ఇతర సదుపాయాలు ఆలస్యం లేకుండా  రాష్ట్ర ప్రభుత్వం సకాలంలో అందించాలంటూ పిటిష‌న‌ర్ హైకోర్టులో ప్ర‌జాప్ర‌యోజ‌న వ్యాజ్యం దాఖ‌లు చేశారు.

ఇటీవ‌ల ఆక్సిజ‌న్ అంద‌క తిరుప‌తి రుయా హాస్ప‌టిల్‌లో 11మంది కొవిడ్‌ పేషెంట్స్‌ ప్రాణాలు వ‌దిలిన విష‌యం తెలిసిందే. మృతుల సంఖ్య‌పైనా ప‌లు అనుమానాలు వ్య‌క్త‌మ‌య్యాయి. త‌మిళ‌నాడు నుంచి రావాల్సిన ఆక్సిజ‌న్ ట్యాంక‌ర్ ఆల‌స్యం కావ‌డంతో.. రుయాలో ప్రాణ‌వాయువు నిలిచిపోయి.. కొవిడ్ రోగులు ప్రాణాలు కోల్పోవ‌డం క‌ల‌క‌లం రేపింది. ప్ర‌భుత్వ ఉదాసీన‌త వ‌ల్లే ఆ మ‌ర‌ణాలు సంభ‌వించాయంటూ.. అందుకు స‌ర్కారుదే బాధ్య‌త అంటూ విప‌క్షాలు ఆరోపించాయి. ఆక్సిజ‌న్ నిల్వ‌ల‌ను స‌మ‌కూర్చుకోలేని చేత‌గాని స‌ర్కారు అంటూ పెద్ద ఎత్తున విమ‌ర్శ‌లు వెల్లువెత్తాయి. తాజాగా, రుయా ఆసుప‌త్రి ఘ‌ట‌న‌పై ఎన్‌హెచ్ఆర్‌సీకి ఫిర్యాదు చేయ‌డం.. ఎఫ్ఐఆర్ న‌మోదు చేసి,  జ్యూడిషియ‌ల్ విచార‌ణ జ‌ర‌పాలంటూ హైకోర్టులో పిల్ దాఖ‌ల‌వ‌డం ఆస‌క్తిక‌రంగా మారింది. జ‌గ‌న్‌రెడ్డి స‌ర్కారు దోషిగా బోనులో నిల‌బ‌డ‌క త‌ప్పేలా లేదు.