విచారణను ఆగస్టు 7కు వాయిదా వేసిన చెంగల్పట్టు కోర్టు..

తమిళనాడు ముఖ్యమంత్రి, కోలీవుడ్ స్టార్ నటుడు విజయ్ వ్యక్తిగత జీవితంలో నెలకొన్న వివాదం ఇప్పుడు హాట్ టాపిక్‌గా మారింది. ఆయన భార్య సంగీత స్వర్ణలింగం దాఖలు చేసిన విడాకుల పిటిషన్‌పై సోమవారం చెంగల్పట్టు మహిళా కోర్టులో కీలక విచారణ జరిగింది. ఇరుపక్షాల లాయర్ల వాదనలను విన్న న్యాయస్థానం.. తదుపరి విచారణను ఈ ఏడాది ఆగస్టు 7వ తేదీకి వాయిదా వేస్తూ నిర్ణయం తీసుకుంది.

గత ఏప్రిల్ నెలలోనే ఈ కేసు కోర్టు ముందుకు వచ్చినప్పటికీ, ఇద్దరూ హాజరుకాకపోవడంతో జూన్ 15న ఖచ్చితంగా రావాలని న్యాయమూర్తి ఆదేశించారు. ఈ నేపథ్యంలోనే ఉదయం కోర్టు ఈ కేసును పరిశీలించింది. కాగా, ఈ ఏడాది ఫిబ్రవరిలోనే సంగీత ప్రత్యేక వివాహాల చట్టం కింద విడాకులు కావాలంటూ న్యాయస్థానాన్ని ఆశ్రయించారు. తన భర్త వల్ల తాను ఎన్నో అవమానాలు, మానసిక క్షోభ అనుభవించానని ఆమె తన పిటిషన్‌లో పేర్కొన్నారు.

విజయ్‌కు మరో సినీ నటితో వివాహేతర సంబంధం ఉందని సంగీత సంచలన ఆరోపణలు చేశారు. సదరు నటితో కలిసి ఆయన విహారయాత్రలకు వెళ్లడమే కాకుండా, ఆ ఫోటోలను సోషల్ మీడియాలో షేర్ చేసి తనను, తన ఇద్దరు పిల్లలైన జాసన్ సంజయ్, దివ్య సాషాలను సమాజంలో తలదించుకునేలా చేశారని ఆవేదన వ్యక్తం చేశారు. గతంలో ఈ విషయంపై నిలదీస్తే ఆ బంధాన్ని కట్ చేసుకుంటానని చెప్పి విజయ్ మోసం చేశారని తెలిపారు.

వీటితో పాటు తనపై తీవ్రమైన ఆర్థిక ఆంక్షలు విధించారని, తన వ్యక్తిగత స్వేచ్ఛను కూడా హరించారని సంగీత కోర్టుకు వివరించారు. ఎన్నో ఏళ్లుగా అనుభవిస్తున్న సౌకర్యాలను సైతం విజయ్ ఉపసంహరించుకున్నారని ఆరోపించారు. ఈ కారణాల వల్ల 2000 సంవత్సరంలో మొదలైన తమ 26 ఏళ్ల వైవాహిక బంధాన్ని ఇక్కడితో ముగించాలని తాను గట్టిగా నిర్ణయించుకున్నట్లు ఆమె స్పష్టం చేశారు.

ఒకవైపు కోర్టులో ఈ తరహా వ్యక్తిగత గందరగోళం నడుస్తుండగా, రాజకీయంగా మాత్రం విజయ్ అద్భుతమైన ఫామ్‌లో ఉన్నారు. ఆయన నేతృత్వంలోని 'తమిళగ వెట్రి కళగం' (టీవీకే) పార్టీ ఇటీవల జరిగిన తమిళనాడు అసెంబ్లీ ఎన్నికల్లో చారిత్రాత్మక విజయాన్ని నమోదు చేసింది. దశాబ్దాలుగా రాష్ట్రాన్ని ఏలుతున్న డీఎంకే, అన్నాడీఎంకే కూటములను మట్టికరిపించి మే 10న ఆయన సీఎంగా పీఠాన్ని అధిరోహించారు.

ముఖ్యమంత్రిగా బాధ్యతలు చేపట్టిన కొద్దిరోజులకే ఈ విడాకుల కేసు తీవ్ర రూపం దాల్చడం తమిళ రాజకీయ వర్గాల్లో పెను సంచలనంగా మారింది. ఇటు సినిమా ఫ్యాన్స్, అటు రాజకీయ అనుచరులు ఈ పరిణామాలను నిశితంగా గమనిస్తున్నారు. రాబోయే ఆగస్టు 7వ తేదీన జరగబోయే తదుపరి కోర్టు విచారణలో ఈ వివాదం ఎలాంటి మలుపు తిరుగుతుందోనని అంతా ఆసక్తిగా ఎదురుచూస్తున్నారు.