కర్నాటకలోని కేడూరులో ఒక ఆస్పత్రి వైద్యులు మహిళ కడుపులో గుడ్డ పెట్టి కుట్టేశారు. ఉడిపి సమీపంలోని కేడూరులోని ఒక ప్రైవేట్ ఆస్పత్రిలో సులోచనా శెట్టి అనే మహిళ రెండో కాన్పు కోసం జూన్ 24న చేరింది. సిజేరియన్ ఆపరేషన్ చేసిన బిడ్డని బయటకి తీశారు. ఆ తర్వాత వైద్యులు ఆమె పొట్టలో ఒక గుడ్డ పెట్టి కుట్లు వేసేశారు. ఆ తర్వాత ఆమెకి ఆనారోగ్య సమస్యలు పెరిగిపోయాయి. కడుపు నొప్పిగా వుండటం, రక్తస్రావం జరుగుతూ వుండటంతో ఆమె స్థానికంగా వున్న ఒక స్కానింగ్ సెంటర్‌లో స్కాన్ చేయించుకుంది. అయితే సదరు స్కానింగ్ సెంటర్ వాళ్ళు స్కానింగ్ రిపోర్టు ఆమెకు ఇవ్వకుండా ఆస్పత్రికే ఇస్తామని చెప్పి పంపేశారు. ఆ తర్వాత సదరు ఆస్పత్రి వాళ్ళు మీకు మళ్ళీ చిన్న ఆపరేషన్ చేయాల్సి వుందని చెప్పి ఆ మహిళను పిలిపించారు. మళ్ళీ ఆపరేషన్ ఎందుకు చేయాలని ఆ మహిళ కుటుంబీకులు అడిగినా ఆస్పత్రివాళ్ళు సరిగా సమాధానం చెప్పలేదు. దాంతో ఆ మహిళను బెంగుళూరుకు తీసుకెళ్ళి పరీక్షలు చేయించగా ఆమె పొట్టలో గుడ్డ వున్న విషయం బయటపడింది. ఈ విషయాన్ని రెండో కంటికి తెలియకుండా చేయాలనే సదరు ప్రైవేట్ ఆస్పత్రివాళ్ళు మళ్ళీ ఆపరేషన్ చేయాలని అన్నారని అర్థం చేసుకున్న మహిళ కుటుంబీకులు పోలీసులకు ఫిర్యాదు చేశారు. మరో ఆస్పత్రిలో ఆపరేషన్ చేయించి పొట్టలో వున్న గుడ్డని బయటకి తీయించారు. గుడ్డ అంటే అదేదో చిన్న గుడ్డ పేలిక కాదు.. చేతులు తుడుచుకునే నేప్‌కిన్.