పుర్రెకోబుద్ధి అనే మాట అందరికీ తెలిసిందే. బ్రిటన్‌లో కొంతమంది యువతరం పుర్రెలకి ఓ విచిత్రమైన బుద్ధి పుట్టింది. కొన్ని జంటలు ఎంచక్కా పెళ్ళి చేసుకోవాలని అనుకుంటున్నాయి. అయితే ఆ పెళ్ళి మామూలుగా కాకుండా వెరైటీగా వుండాలని భావిస్తున్నాయి. ఇంతకీ ఆ వెరైటీ ఏమిటంటే, వధూవరులిద్దరూ పెళ్ళి చేసుకునే సమయంలో బట్టలు వేసుకోరు అదన్నమాట. ఈ తరహా వివాహాలు చేసుకోవాలని కోరుకుంటున్న వారి సంఖ్య ఈమధ్యకాలంలో యు.కె.లో విపరీతంగా పెరిగిపోయింది. ఇప్పటికే ఇలాంటి పెళ్ళిళ్ళు చాలామంది చేసేసుకున్నారు. అయితే ప్రభుత్వం ఇలాంటి వివాహాలకు అనుమతి ఇచ్చే ప్రసక్తే లేదని తేల్చి చెప్పింది. కాకపోతే ఈమధ్యకాలంలో బ్రిటన్లో ఓ పుకారు షికారు చేసింది. ఇలాంటి నగ్న వివాహాలకు కోర్టు అనుమతి ఇచ్చిందని, ఇక కుర్ర జంటలు ఎంచక్కా బట్టలు విప్పేసి పెళ్ళిళ్ళు చేసుకోవచ్చనేది ఆ పుకారు సారాంశం. దాంతో చాలామంది ఈ టైపు పెళ్ళిళ్ళకి రెడీ అయిపోయారు. దాంతో బ్రిటన్ న్యాయశాఖాధికారి రంగంలోకి దిగి ఇలాంటి పెళ్ళిళ్ళకి ప్రభుత్వం గానీ, కోర్టులుగానీ ఎలాంటి అనుమతి ఇవ్వలేదని స్పష్టం చేశారు. దాంతో చాలామంది యువతీ యువకులు నిరాశకు గురయ్యారు.