కేంద్రంలో ఎన్నికలముందే మరోసారి క్యాబినెట్‌ విస్తరణ వచ్చేనెల పార్లమెంట్‌ సమావేశాల తర్వాత జరుగుతుందని పార్టీవర్గాల భోగట్టా. దీనికి సంబంధించి అన్ని లాంచనాలు పూర్తయ్యాయని, సెప్టెంబరు 6 తర్వాత ఈ కార్యక్రమం జరుగుతుందని నాయకులు చెబుతున్నారు. ఇప్పటికీ చాలా కీలక పదవులు ఖాళీగా ఉండటమే దీనికి కారణంగా చెబుతున్నారు. ఇందులో భాగంగానే రాహుల్‌ పదవిని అలంకరించనున్నారని తెలుసింది. అలాగే మన రాష్ట్రం నుండి రాజ్యసభ సభ్యుడిగా ఉన్న చిరంజీవికి కూడా ఒక పదవి ఇవ్వనున్నారని పార్టీ వర్గా సమాచారం. రాహుల్‌ని 2014 కి ముందే మంత్రి పదవి చేపట్టడం ద్వారా అనుభవం గణించి తద్వారా యుపిఎ 3 లో ప్రధాన మంత్రిగా ప్రమాణ స్వీకారం చేయించవచ్చని కాంగ్రెస్‌ అధినేత్రి సోనియా గాంధీ ప్రణాళికగా తెలుస్తుంది. అందులో భాగంగానే ఇప్పుడు ప్రిన్స్‌ గ్రామీణాభివృద్దిగాని, మానవ వనరుల శాఖగాని చేపట్టే అవకాశాలు ఎక్కువగా ఉన్నాయి. ఇప్పటికే ఖాళీ అయిన మంత్రి పదవులు చాలానే ఉన్నాయి. వీరభద్రాసింగ్‌, శశిధరూర్‌, అగాధసంగ్మా, కనిమొళి, అస్కార్‌ ఫెర్నాండేజ్‌ దివంగత మంత్రి విలాస్‌రావ్‌ దేశ్‌ ముఖ్‌ లాంటివారి మంత్రిపదవులు ఖాళీగా ఉన్నాయి. అయితే విదేశీ వ్యవహారాల మంత్రి ఎస్‌ఎం కృష్ణను ఆ బాధ్యతల నుండి తప్పించి రానున్న ఎన్నికల కోసం కర్ణాటక ఇన్‌ఛార్జ్‌గా వేయనున్నారు. ఈ క్యాబినెట్‌ విస్తరణలో రాష్ట్ర కాంగ్రెస్‌నుండి చిరంజీవి, డిఎంకే పార్టీనుండి కనిమొళనికి, దయానిధి మారన్‌కి ఇవ్వనున్నట్లు సమాచారం.