బ్రేకింగ్.. చంద్రబాబుకు త్రుటిలో తప్పిన ప్రమాదం!!
Published on: Sat Sep 5, 2020 6:47PM
టీడీపీ అధినేత, మాజీ సీఎం చంద్రబాబుకు త్రుటిలో ప్రమాదం తప్పింది. విజయవాడ నుంచి హైదరాబాదుకు రోడ్డు మార్గంలో వస్తుండగా.. ఆయన కాన్వాయ్ లోని వాహనానికి ప్రమాదం జరిగింది. యాదాద్రి భువనగిరి జిల్లా చౌటుప్పల్ మండలం దండుమల్కాపురం వద్ద ఈ ప్రమాదం చోటు చేసుకుంది.
కాన్వాయ్ కి ఓ ఆవు అడ్డురావడంతో ఎస్కార్ట్ వాహనం డ్రైవర్ సడన్ బ్రేక్ వేశారు. ఈ క్రమంలో కాన్వాయ్ లో ముందు ఉన్న ఎస్కార్ట్ వాహనాన్ని బుల్లెట్ ప్రూఫ్ వాహనం ఒక్కసారిగా ఢీ కొట్టింది. ఆ తర్వాతి వాహనంలోనే చంద్రబాబు ఉన్నారు. ఈ ప్రమాదంలో చంద్రబాబు సహా, ఎవరికీ ఏమీ కాకపోవడంతో అందరూ ఊపిరి పీల్చుకున్నారు. కేవలం వాహనాలు మాత్రమే స్వల్పంగా డ్యామేజ్ అయ్యాయి. ఈ ఘటన అనంతరం కాన్వాయ్ అక్కడి నుంచి హైదరాబాదు వైపు కదిలింది.


