తెలంగాణ ప్రభుత్వం విధించిన 1956 స్థానికత నిబంధన విషయంలో కేంద్ర పట్టణాభివృద్ధి శాఖ మంత్రి వెంకయ్య నాయుడు స్పందించారు. దేశంలోని ఏ రాష్ట్రం ప్రజలైనా ఏ రాష్ట్రంలో అయినా నివాసం వుండవచ్చని, అక్కడి సదుపాయాలు పొందవచ్చని ఆయన వ్యాఖ్యానించారు. తెలంగాణ ప్రభుత్వం విధించిన 1956 నిబంధన మీద తమ పార్టీ స్థానిక నాయకులు స్పందిస్తారని ఆయన తెలిపారు. ఆంధ్రప్రదేశ్ రాష్ట్ర విభజనను హడావిడిగా చేసిన కాంగ్రెస్ నాయకులు సరైన జాగ్రత్తలు తీసుకోకపోవడం వల్లనే ఇప్పుడు రెండు రాష్ట్రాల మధ్య ఇన్ని వివాదాలు తలెత్తుతున్నాయని, రెండు రాష్ట్రాలూ వివాదాలను సామరస్యంగా పరిష్కరించుకోవాలని తాను రెండు రాష్ట్రాల ముఖ్యమంత్రులకు సూచించానని ఆయన తెలిపారు. ఇరు రాష్ట్రాల మధ్య వివాదాలు మంచిది కాదని, మనం తెలుగు వాళ్ళం, రెండు రాష్ట్రాల మధ్య వివాదాలు ఉండడం మంచిది కాదు అని ఆయన చెప్పారు.