రాజ్‌భవన్‌లో సీబీఐ విచారణ ముగిసింది. అగస్టా వెస్ట్‌ల్యాండ్ హెలికాఫ్టర్ల కుంభకోణం కేసులో ఆంధ్రప్రదేశ్, తెలంగాణ రాష్ట్రాల గవర్నర్ నరసింహన్‌ను సీబీఐ గంటన్నరపాటు ప్రశ్నించింది. ఈ ఉదయం రాజ్‌భవన్‌కు చేరుకున్న సీబీఐ అధికారులు గవర్నర్‌కు ప్రశ్నావళిని అందించి వాంగ్మూలం తీసుకున్నారు. సెక్షన్ 161(ఏ) ప్రకారం గవర్నర్ వాంగ్మూలాన్ని సీబీఐ నమోదు చేసుకుంది. అగస్టా వెస్ట్ ల్యాండ్ హెలికాఫ్టర్ల కొనుగోలు సమయంలో గవర్నర్ నరసింహన్ ఐబీ చీఫ్‌గా ఉన్నారు. అగస్టా హెలికాప్టర్ల కొనుగోలు అంశంతో ప్రమేయం వున్న నారాయణన్, వాంగ్ ఛూలను సీబీఐ ఇప్పటికే ప్రశ్నించడం, మొన్నటి వరకూ గవర్నర్ పదవులను వెలగబెట్టిన వారిద్దరూ తమ పదవుల నుంచి తప్పుకోవడం తెలిసిందే. ఇప్పుడు సీబీఐ నరసింహన్‌ని ప్రశ్నించింది. ఈ నేపథ్యంలో నరసింహన్ గవర్నర్‌ గిరీకి రాజీనామా చేయక తప్పదా అనే సందేహాలు కలుగుతున్నాయి.